चन्द्रागिरि, काठमाडौँ। काठमाडौँको चन्द्रागिरि नगरपालिकाको स्वास्थ्य शाखामा चरम लापरबाही र भद्रगोल अवस्था फेला परेको छ। नगरभित्रका स्वास्थ्य चौकीदेखि अस्पतालसम्म नियमित रूपमा वितरण गरिने संवेदनशील औषधि र भ्याक्सिन (खोप) को ओसारपसार र आपूर्ति प्राविधिक ज्ञान नभएका कार्यालय सहयोगीमार्फत गराइने गरेको पाइएको छ।
औषधिको नाम र त्यसको संवेदनशीलता समेत थाहा नहुने तल्लो तहका कर्मचारीलाई स्वास्थ्य जस्तो गम्भीर र प्राविधिक जिम्मेवारी सुम्पिँदा जनस्वास्थ्यमा गम्भीर संकट निम्तिने खतरा बढेको छ। यस कदमप्रति चन्द्रागिरिका स्थानीय बासिन्दाहरूले तीव्र आक्रोश व्यक्त गरेका छन्।
प्रमुख महतोको ‘बेइमानी’ र स्वास्थ्यमा भद्रगोल
नगर स्वास्थ्य शाखाका प्रमुख शम्भु कुमार महतोको गैरजिम्मेवारपूर्ण कार्यशैली र बेइमानीका कारण यो स्थिति सिर्जना भएको स्थानीयको आरोप छ। भ्याक्सिन र जीवनरक्षक औषधिहरूको भण्डारण, तापक्रम (Cold Chain) व्यवस्थापन र वितरण अत्यन्तै संवेदनशील प्राविधिक प्रक्रिया हो। यसका लागि निश्चित स्वास्थ्य प्रविधिक वा फर्मासिस्टको आवश्यकता पर्दछ।
तर, चन्द्रागिरि स्वास्थ्य शाखाले भने जनशक्ति व्यवस्थापनमा ध्यान नदिई कार्यालय सहयोगीलाई नै औषधि बाँड्ने काममा खटाएको छ। जसका कारण गलत औषधि आपूर्ति हुने वा तापक्रम नमिल्दा भ्याक्सिन नै निष्क्रिय हुने उच्च जोखिम बढेको छ।
कार्यक्रमका नाममा भत्ता स्वाहा, जिम्मेवारी कसको?
एकातिर औषधिको संवेदनशीलता र जनशक्ति व्यवस्थापनमा ध्यान दिइएको छैन, भने अर्कोतिर स्वास्थ्य शाखाभित्र बजेटको व्यापक दुरुपयोग भइरहेको गुनासो बढेको छ। विभिन्न तालिम, अभिमुखीकरण र अनुगमनका नाममा दैनिक भत्ता र बजेट भने व्यापक रूपमा सिध्याउने काम भइरहेको स्रोतको दाबी छ।
यस्तो भद्रगोल अवस्थाका बीच भोलि नागरिकको स्वास्थ्यमा कुनै गम्भीर असर परेमा वा औषधिको गलत प्रयोगका कारण कुनै दुर्घटना भएमा यसको जिम्मेवारी कसले लिने भन्ने गम्भीर प्रश्न खडा भएको छ।
स्थानीय आक्रोशित, तत्काल छानबिनको माग
स्वास्थ्य शाखाको यो कदम सार्वजनिक भएपछि चन्द्रागिरिका स्थानीयबासी र सरोकारवालाहरू आक्रोशित बनेका छन्। उनीहरूले नगरबासीको स्वास्थ्यमाथि खेलबाड गर्ने स्वास्थ्य शाखा प्रमुख महतोमाथि तत्काल छानबिन गरी कानुनी कारबाही गर्न र स्वास्थ्य क्षेत्रको बेथिति अन्त्य गर्न नगरपालिका प्रशासनसँग माग गरेका छन्।
