—Khem Raj Adhikari
स्तम्भन्युज खबर
काठमाडौं, १९ भाद्र
काठमाडौं महानगरपालिका–३२, पेप्सीकोला प्लानिङ क्षेत्रमा गएराति भीषण आगलागी भएको छ। यस दुर्घटनाबाट १० वटा पसल र ३ वटा पक्की घरमा क्षति पुगेको छ भने ६ भन्दा बढी घर–टहरा पूर्णरूपमा जलेर नष्ट भएका छन्।
आगलागीको सूचना प्राप्त हुनासाथ काठमाडौं महानगरपालिकाको जुद्ध वारुणयन्त्र कार्यालयबाट कार्यालय प्रमुख तथा महानगर प्रहरी डीएसपी लीलाराज गच्छाको नेतृत्वमा ३ वटा दमकल, ३० जना अग्नि नियन्त्रक र २ वटा पानी ट्याङ्करसहितको टोली तत्काल घटनास्थलमा खटाइएको थियो। आगलागी नियन्त्रणका लागि नेपाली सेना र छिमेकी पालिकासँगको समन्वयमा अन्य दमकलहरू समेत परिचालन गरिएको थियो। आगलागीको क्रममा ग्यास सिलिन्डर पड्किएपछि आगो थप फैलिएको बताइएको छ।
यस घटनाका कारण काठमाडौं क्याफे, बम्बू कटेज (Bamboo Cottage), तरकारी पसल, सेकुवा क्याफे तथा खाद्यान्न पसललगायतका विभिन्न व्यवसाय र संरचनाहरूमा ठूलो क्षति पुगेको छ।
महानगरपालिकाका अग्नि नियन्त्रक टोलीको अविरल प्रयास र सुरक्षाकर्मीको सक्रियताले आगो पूर्णरूपमा नियन्त्रणमा लिन सफल भएको छ। यस ठूलो दुर्घटनामा कुनै पनि मानवीय क्षति नभएको अधिकारीहरूले पुष्टि गरेका छन्।
सतर्कता अपनाउन महानगरको अपिल
यस घटनाले आगलागी नियन्त्रणपछिको प्रयासभन्दा पनि आगलागी हुन नदिन पूर्वतयारी र सावधानी अपनाउनु अति आवश्यक रहेको देखाएको छ। महानगरपालिकाले ग्यास सिलिन्डर, विद्युतीय उपकरण तथा सम्भावित आगलागीका अन्य स्रोतहरूको सुरक्षित व्यवस्थापन गर्न, अग्नि नियन्त्रणसम्बन्धी सामग्रीको तयारी राख्न र प्रभावकारी आपतकालीन योजना बनाउन सम्बन्धित सबैमा जोडदार अपिल गरेको छ।
