— खेम राज अधिकारी
स्तम्भन्युज खबर
भाद्र १८, काठमाडौँ । सरकारले रसुवाको भोटेकोशी नदीमा आएको बाढीबाट प्रभावितका लागि विशेष राहत, क्षतिपूर्ति तथा सहुलियत घोषणा गर्नुका साथै आगामी भदौ २३ गते ‘जेनजी शहीद दिवस’का अवसरमा देशभर सार्वजनिक बिदा दिने निर्णय गरेको छ।
प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकका ७ मुख्य निर्णयहरू सरकारका प्रवक्ता सस्मित पोखरेलले सार्वजनिक गर्नुभएको हो।
मन्त्रिपरिषद् बैठकका ७ मुख्य निर्णयहरू:
- ADB बाट अनुदान स्वीकार: एसियाली विकास बैंक (ADB) बाट भोटेकोशी बाढी प्रभावित जनताको जीवनरक्षा, तत्कालीन आपतकालीन उद्धार तथा राहत कार्यका लागि प्राप्त हुने ५ मिलियन अमेरिकी डलर अनुदान सहायता स्वीकार गर्ने।
- एकीकृत व्यवसाय पुनर्स्थापन योजना: रसुवाको भोटेकोशी बाढीबाट प्रभावित व्यक्ति, उद्योग, व्यापार तथा व्यवसायलाई तत्काल सुचारू गर्न राहत, कर तथा महसुल लगायतका अन्य सहुलियत उपलब्ध गराउने।
- सहुलियत दरमा चिनी आयात: साल्ट ट्रेडिङ कर्पोरेशन र खाद्य व्यवस्था तथा व्यापार कम्पनीमार्फत कूल २५ हजार मेट्रिकटन चिनी १ प्रतिशत भन्सार महसुलमा आयात गर्न स्वीकृति प्रदान गर्ने।
- सुरक्षाकर्मी र राष्ट्रसेवकलाई विशेष सुविधा: खोज तथा उद्धारमा खटिएका सुरक्षाकर्मी र कर्मचारीलाई जोखिम भत्ता, खाजा खर्च, घाइते भएमा नि:शुल्क उपचार र मृत्यु भएमा परिवारलाई प्रतिमृतक रु. १० लाख राहत उपलब्ध गराउने।
- जेनजी शहीद दिवसमा सार्वजनिक बिदा: विसं २०८३ साल भदौ २३ गते ‘जेनजी शहीद दिवस’को अवसरमा नेपाल राज्यभर सार्वजनिक बिदा दिने।
- भदौ २२ गते राष्ट्रिय शोक: भदौ १० गते भोटेकोशी नदीमा आएको भीषण बाढीमा मृत्युवरण गर्नेहरूको सम्मानमा १३ औं दिनको पुण्यतिथी (भदौ २२ गते सोमबार) राष्ट्रिय शोक मनाउने र नेपालभरका सरकारी कार्यालय तथा विदेशस्थित नेपाली दूतावास एवं नियोगहरूमा राष्ट्रिय झण्डा आधा झुकाउने।
- सचिव बढुवा तथा पदस्थापन: नेपाल प्रशासन सेवातर्फको राजपत्रांकित विशिष्ट श्रेणीको सचिव पदमा नारायणप्रसाद भट्टलाई बढुवा गरी मुख्यमन्त्री तथा मन्त्रिपरिषद्को कार्यालय, कोशी प्रदेशको मुख्यसचिवमा पदस्थापन गर्ने।
Facebook Comments Box
