२२ असार, रुपन्देही । सरकारले आगामी आर्थिक वर्ष ०८४ सम्म देशभरका सबै भूमिहीन नागरिकलाई जग्गाधनी प्रमाण–पूर्जा वितरण गर्ने गरी काम अघि बढाएको अर्थमन्त्री तथा उपप्रधानमन्त्री विष्णुप्रसाद पौडेलले बताएका छन्।
आइतबार रुपन्देहीको कन्चन गाउँपालिका–५ मा आयोजित एक कार्यक्रममा ४५१ जना स्थानीयलाई जग्गाधनी प्रमाण–पूर्जा वितरण गर्दै मन्त्री पौडेलले भूमिहीन जनतालाई ढुक्क भएर बस्न आग्रह गरेका हुन्। उनले प्रधानमन्त्रीबाट स्पष्ट निर्देशनअनुसार सम्बन्धित निकाय सक्रिय भएर काम गरिरहेको जानकारी दिए।
“यो सरकारको अठोट हो, यसलाई जसरी पनि पूरा गरेर अघि बढ्छौं,” मन्त्री पौडेलले भने, “अब कन्चन र रुपन्देही मात्रै होइन, देशभरका भूमिहीनलाई सम्पत्तिको मालिक बनाइने छ।”
उनले निर्वाचनका बेला भूमिहीनहरूसँग गरिएको वाचा बमोजिम भूमि समस्या समाधान आयोगमार्फत कामलाई तीव्रता दिएको बताए। “हामीले भनेका थियौं कि सिरानीमुनि लालपूर्जा राखेर सुत्न पाइनेछ, त्यो बेला भावनात्मक रूपमा भनिएको भए पनि अहिले त्यसैका आधारमा काम भइरहेको छ,” उनले जोड दिए।
भूमि समस्या समाधान आयोगले हालसम्म उल्लेख्य प्रगति गरेको र यसको प्रत्यक्ष लाभ जनताले पाउन थालेको पौडेलले बताए।
