२२ असार, काठमाडौं। श्री नेवा सम्पर्क समूह रामेछाप अन्तर्गत सञ्चालित सोलुथुम्का कला समूहको आयोजनामा भएको सोलुथुम्का नृत्य प्रतियोगिता भव्य रूपमा सम्पन्न भएको छ। रामेछापमा आयोजित प्रतियोगितामा कुल १८ जना युवा युवतीहरूले आफ्नो नृत्य प्रतिभा प्रस्तुत गरेका थिए।
कार्यक्रममा नेवा सम्पर्क समूहका संस्थापक अध्यक्ष नन्दबहादुर श्रेष्ठ, वर्तमान अध्यक्ष रामकुमार श्रेष्ठ, पूर्व अध्यक्षहरू ताराराम श्रेष्ठ, हरिबहादुर श्रेष्ठ, केशरबहादुर श्रेष्ठ, टिकाराम श्रेष्ठ तथा भक्तपुरबाट आएका अतिथि रामहरि श्रेष्ठ र खाँडादेवी जेसिजका पूर्व अध्यक्ष तथा युवा व्यवसायी ॐराज श्रेष्ठ लगायत विशिष्ट व्यक्तिहरूको उपस्थिति रहेको थियो।
कार्यक्रममा मनोरञ्जन विभाग प्रमुख हिमाल श्रेष्ठले प्रतियोगिताको उद्देश्यबारे प्रकाश पार्दै भने, “हामीभित्र लुकेका प्रतिभा उजागर गर्दै हाम्रो मौलिक कला र संस्कृतिको संरक्षण तथा प्रवर्द्धन गर्नु नै हाम्रो मुख्य उद्देश्य हो।”
त्यस्तै, सल्लाहकार सम्झना श्रेष्ठले समूहले युवालाई लक्षित गर्दै विभिन्न सांस्कृतिक कार्यक्रम गर्दै आएको जानकारी दिँदै भनिन्, “यस नृत्य प्रतियोगिता मार्फत युवाहरूमा रहेको अन्तरनिहित प्रतिभा बाहिर ल्याउनुका साथै नेवारी संस्कृति र परम्परालाई संरक्षण गर्न योगदान पुग्नेछ।”
प्रतियोगितामा रुपेश तामाङ प्रथम भई प्रमाणपत्र, मायाको चिनो र नगद १० हजार रुपैयाँ पुरस्कार प्राप्त गर्न सफल भए। दोस्रो स्थान सोनिका तामाङले हासिल गर्दै नगद ७ हजार रुपैयाँ पुरस्कार पाइन् भने तेस्रो स्थान जस्मी श्रेष्ठले हात पारिन् र उनले नगद ५ हजार रुपैयाँ जितिन्। प्रतियोगितामा सृष्टि श्रेष्ठले उत्कृष्ट चार स्थान प्राप्त गरिन्।
साेलुथुम्का कला समूहकी अध्यक्ष सृष्टि श्रेष्ठले प्रतियोगिता सम्पन्न भएपछि भनिन्, “यो प्रतियोगिता हाम्रो संस्कृति जगेर्नाको एउटा प्रयास मात्र नभएर, युवाहरूलाई सक्रिय रूपमा आफ्नो पहिचानप्रति गर्व गर्न सिकाउने माध्यम पनि हो। भविष्यमा अझ धेरै यस्ता कार्यक्रमको आयोजना गरी हामीले हाम्रो संस्कृति बचाउने छौं।”
प्रतियोगिताले स्थानीय तहमा सांस्कृतिक चेतना अभिवृद्धि गर्दै समुदायमा एकताको भावना समेत बढाएको सहभागी र दर्शकहरूले बताएका छन्।
