ठमाडौं । नेकपा (एकीकृत समाजवादी) ले अध्यक्ष, सम्मानित नेता र महासचिवमा सर्वसहमतिले नेतृत्व चयन गरेको छ ।
बिहीवार झलनाथ खनाल नेतृत्वको अध्यक्ष मण्डलले माधवकुमार नेपाललाई अध्यक्ष, झलनाथ खनाललाई सम्मानित नेता र घनश्याम भुसाललाई सम्मानित नेतामा चयन गरेको हो ।
महाधिवेशन हलले सम्मानित नेता खनालले अध्यक्षमा माधवकुमार नेपाल, पार्टीको सम्मानित नेतामा झलनाथ खनाल र पार्टीको महासचिवमा घनश्याम भुसाल सर्वसहमतले चयन भएको घोषणा गरे ।
उनले अब २९९ सदस्यहरु भएको केन्द्रीय कमिटी र निश्चित पदाधिकारी चयन गर्न बाँकी रहेको बताए ।
उनले भने, ‘अझै हाम्रा काम बाँकी छन् । त्यसमध्ये सिंगो केन्द्रिय कमिटीमा २९९ सदस्यहरु भएको केन्द्रीय कमिटी र निश्चित पदाधिकारी चयन गर्न बाँकी छ । त्यसमा पनि सहमति साथ नै गर्नुपर्छ भन्नुभएको छ । अब स्वभाविक रुपले यसले अलिकति समय लिन्छ, त्यसको लागि म्याण्डेट दिनुहोला ।’
उनले सचिवालय बैठक बसेर बाँकी काम टुंगो लगाउने जानकारी दिए ।
पदाधिकारी चयन नभएकोमा रामकुमारी असन्तुष्ट
नेकपा एकीकृत समाजवादीको १० औं महाधिवेशनबाट तीन जना पदाधिकारी मात्रै चयन गरि प्रतिनिधिहरूलाई घर पठाएकोप्रति पार्टीकी निवर्तमान सचिव रामकुमारी झाँक्रीले असन्तुष्टी जनाएकी छिन्।
महाधिवेशनमा अध्यक्ष, सम्मानित नेता र महासचिव सर्वसम्म चयन भएपनि अन्य बाँकी पदाधिकारी चयन सचिवालयले गर्ने भन्दै महाधिवेशन प्रतिनिधिलाई घर पठाएपछि झाँक्रीले असन्तुष्टी जनाएकी हुन् । उनको असन्तुष्टि मुख्यगरि महाधिवेशनको अध्यक्ष मण्डलको अध्यक्ष रहेका झलनाथ खनालप्रति छ।
‘अध्यक्ष र महासचिव सर्वसम्मत गर्न म समेतको प्रयास सफल भएको हो,’ झाँक्रीले समाजिक संजाल एक्समा लेखेकी छिन्, ‘तर अध्यक्ष मण्डलका अध्यक्ष झलनाथ खनाललाई पदाधिकारीदेखि केन्द्रीय सदस्यसम्म सर्वसम्म गर्यौं, भयो, भनेर प्रतिनिधिहरूलाई घर पठाउने म्यान्डेट कसले दियो? को पदाधिकारी ? को सदस्य ? खैत खनाल कमरेड?’
