काठमाडौं । बोलीमा लगाम नलगाउँदा जुन घरमा ओली–प्रचण्डलाई ‘मार्सी चामल’को भात खुवाएका थिए, त्यही घरबाट आज दुर्गा प्रसाईं पक्राउ परेका छन् ।
विवादास्पद मेडिकेल व्यवसायी दुर्गा प्रसाईंलाई अदालतले तीन दिन हिरासतमा राख्ने अनुमति दिएको छ। आइतबार दिउँसो पक्राउ परेका प्रसाईंलाई साइबर ब्युरो हुँदै काठमाडौँ जिल्ला अदालत लगिएको थियो।
जिल्ला अदालतका न्यायाधीश बालकृष्ण वाग्लेको इजलासले प्रसाईंलाई तीन दिन हिरासतमा राखेर अनुसन्धान गर्न म्याद थप गरेको जिल्ला अदालत काठमाडौँका स्रेस्तेदार रामु शर्माले जानकारी दिए।
प्रसाईं विरुद्ध साइबर ब्युरोमा उजुरी परेको थियो।
राष्ट्रिय स्वतन्त्र पार्टी (रास्वपा) केन्द्रीय सदस्य टीका संग्रौला (ज्वाला) लगायतका पीडित महिलाले प्रसाईंविरुद्ध ब्युरोमा जाहेरी दिएका थिए।
सोही जाहेरीपछि अदालतको अनुमति लिएर प्रसाईंलाई प्रहरीले पक्राउ गरेको हो।
विभिन्न व्यक्तिको चरित्रहत्या गर्ने, वेश्यावृत्ति गरेको आरोप लगाउने तथा आपत्तिजनक अभिव्यक्ति दिने लगायतका विषय उल्लेख गरेर प्रसाईंविरुद्ध जाहेरी परेको थियो।
युट्युब, फेसबुक र टिकटकमा तथानाम भनिरहेको भेटिने प्रसाईं आजबाट भने हिरासतमा भेटिनेछन् । प्रहरीले पक्राउ गरी भ्यानमा हाल्दै गर्दा प्रसाईंले बोली रोकेनन्,
पक्राउ पर्दै गर्दा प्रसाईंले भने– “एक थोपा रगत हुँदासम्म केपी ओलीसँग लड्छु क्या” ।
