काठमाडौं, ४ भदौ । सङ्घीय संसद्को प्रतिनिधि सभा बैठक आज अपराह्न १ बजे नयाँ बानेश्वरस्थित संसद् भवनमा बस्ने भएको छ । आजको बैठकमा प्रधानमन्त्री केपी शर्मा ओलीले सांसदहरूले उठाएका प्रश्नहरूको जवाफ दिने प्रमुख कार्यसूची रहेको छ ।
प्रतिनिधि सभा नियमावली, २०७९ बमोजिम सांसदहरूले सरकारलाई विभिन्न क्षेत्रसँग सम्बन्धित जिज्ञासा राख्ने तथा जवाफ प्राप्त गर्ने प्रावधानअनुसार प्रधानमन्त्री ओली आजको बैठकमा प्रत्यक्ष जवाफ दिन उपस्थित हुनेछन् । सांसदहरूले उठाएका प्रश्नहरू शासनप्रणाली, विकास, सार्वजनिक सेवा, नीति तथा कार्यान्वयनलगायत विविध विषयसँग सम्बन्धित हुने अपेक्षा गरिएको छ ।
आजको बैठकमा कानुन निर्माणसम्बन्धी एजेन्डा पनि रहेको छ । महिला, बालबालिका तथा ज्येष्ठ नागरिकमन्त्री नवलकिशोर साहले ‘बालबालिका सम्बन्धी (पहिलो संशोधन) विधेयक, २०८२’ माथि विचार गरियोस् भन्ने प्रस्ताव प्रस्तुत गर्ने कार्यसूची रहेको छ । यस विधेयकमार्फत बालअधिकार संरक्षण, बालश्रम नियन्त्रण तथा बालबालिकामाथि हुने विभिन्न प्रकारका हिंसा रोकथामका कानुनी प्रावधानलाई थप स्पष्ट र प्रभावकारी बनाउनुपर्ने धारणा प्रस्तुत गरिएको छ ।
यस्तै, आजको बैठकमा ‘मानव बेचविखन तथा ओसारपसार (नियन्त्रण) पहिलो संशोधन विधेयक, २०८१’ लाई सम्बन्धित समितिमा पठाउने प्रस्ताव पनि पेश गरिनेछ । यस विधेयकले मानव बेचविखन र ओसारपसार नियन्त्रणसम्बन्धी कानुनी ढाँचा परिमार्जन गर्दै अन्तर्राष्ट्रिय मान्यताअनुरूप प्रभावकारी कार्यान्वयन सुनिश्चित गर्ने उद्देश्य लिएको छ ।
प्रतिनिधि सभा बैठकमा प्रस्तुत हुने यी विधेयक र प्रधानमन्त्री ओलीको जवाफप्रक्रियाले आजको बैठकलाई महत्त्वपूर्ण बनाएको छ । विशेषगरी बालबालिका संरक्षण र मानव बेचविखन नियन्त्रणसँग सम्बन्धित कानुनी संशोधन प्रस्तावहरूले बैठकमा व्यापक चासो पाउने अनुमान गरिएको छ ।
-खेम राज अधिकारी
