काठमाडौँ । राष्ट्रिय जनमोर्चाले शिक्षक आन्दोलनप्रति खेलवाड नगर्न आग्रह गर्दै सरकारको ध्यानाकर्षण गराएको छ ।
शिक्षकको आन्दोलन समग्र शिक्षाप्रणाली र देशको भविष्यसित जोडिएको धारणा राख्दै राजमोले सरकारको ध्यानाकर्षण गराएको हो ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८२ वैशाख ३ गते मङ्गलबार प्रेसवक्तव्य जारी गर्दै राजमोले सरकार आफैले गरेको सहमति पालना नगरेर गैरजिम्मेवारपन रवैया देखाएको ठहर गरेको छ । प्रेसवक्तव्यमा सरकारले शिक्षकका माग समेटर नयाँ शिक्षा ऐन ल्याउने सहमति गरिसकेको अवस्थामा अहिलेको आन्दोलनले अविलम्ब शिक्षा ऐन माग गर्नु जायज भएको बताइएको छ ।
शिक्षक आन्दोलनका माग पूरा गराउनका लागि जनदबाब सिर्जना गर्न अपिल गरिएको प्रेसवक्तव्यको पूर्ण पाठ यस्तो छ :
“शिक्षकको दुई हप्तादेखि निरन्तर चलिरहेको आन्दोलनप्रति राष्ट्रिय जनमोर्चाको गम्भीर ध्यान आकर्षित भएको छ । उनीहरूका माग बिल्कुल सिधा र न्यायपूर्ण रहेका छन् ।
उनीहरूले पहिले सरकारसित सम्झौता गरेर सहमतिका मागअनुसार नै शिक्षा ऐन निर्माणको माग गरेका छन् । पहिले स्वयम् आफै सहमत भइसकेपछि त्यसअनुसार शिक्षा ऐनको निर्माण नगर्नु सरकारको गम्भीर गैरजिम्मेवारपन हो ।
सरकारले शिक्षकसित वार्ताको लागि आह्वान गरेको छ तर वार्ता गरेर सहमति भएका मागलाई सरकारले बारम्बार उलङ्घन गर्ने र त्यसअनुसार कानुन निर्माण नगर्ने गरेपछि अर्को वार्ता वा सम्झौता के अर्थ भयो ? त्यो अवस्थामा शिक्षकले कुनै वार्ता वा नयाँ सम्झौताको सट्टामा सिधै शिक्षा ऐनको माग गर्ने अडान न्यायपूर्ण छ । हामीले सरकारसित स्वयम् सरकारले पहिले शिक्षकसित गरेको सम्झौताअनुसार शीघ्र शिक्षा ऐन बनाउनुपर्ने आवश्यकता जोड दिन्छौँ ।
सरकारले पहिले आफै सहमत भएका सम्झौताअनुसार शिक्षा ऐन नबनाएको हुनाले नै शिक्षकले ठुलो सङ्ख्यामा आएर सङ्घर्ष गर्नु परिरहेको छ । त्यसबाट शिक्षकको अनावश्यक रूपले ठुलो धनराशि खर्च भइरहेको छ । त्योबाहेक देशभरि नै विद्यार्थीको भर्ना, पठनपाठन, कतिपय परीक्षा वा पहिले परीक्षा भएका कपीको जाँच गर्ने काममा समेत बाधा पुगेको छ । ती सबैका लागि सरकारको गैरजिम्मेवारपन नै जिम्मेवार छ । पहिले त त्यसले शिक्षकसित भएका सम्झौताअनुसार शिक्षा ऐनको निर्माण गरेन । अब शिक्षकहरू सङ्घर्षमा उत्रेपछि उनीहरूका मागप्रति पनि सरकार गम्भीर भएको छैन । त्यसबाट शिक्षकलाई ठुलो कष्ट पुग्नुका साथै सम्पूर्ण शिक्षाप्रणाली नै ध्वस्त हुने सम्भावना पैदा भएको छ ।
देशमा त्यस प्रकारको स्थिति उत्पन्न हुन नदिन राष्ट्रिय जनमोर्चाले देशका सम्पूर्ण न्यायप्रमी जनतासित शिक्षकका माग पूरा गराउन सरकारमाथि जनदबाब सिर्जना गर्न अपिल गर्दछ । समग्र रूपमा यो कुरा प्रष्ट छ कि अहिलेको शिक्षक आन्दोलन खालि शिक्षकसित मात्र जोडिएको नभएर हाम्रा सबै छोराछोरी र उनीहरूको भविष्य तथा त्यसरी सम्पूर्ण देशको भविष्यसित समेत जोडिएको छ । त्यसकारण हामीले शिक्षकको आन्दोलन र देशको सम्पूर्ण भविष्यसित खेलवाड नगर्नका लागि सरकारको गम्भीर ध्यान आकर्षण गर्न चाहन्छौँ ।”
