रोसन दानी, ०२ जेठ काठमाडौं । दहचोक युवा समूहको पहलमा आउँदो शनिबार खोला–नाला सरसफाइ कार्यक्रम सञ्चालन हुने भएको छ।
वातावरण संरक्षण तथा सामुदायिक स्वास्थ्यमा सुधार गर्ने उद्देश्यले आयोजना गरिएको यस अभियानमा स्थानीय समुदायका विभिन्न तह र तप्काबाट व्यापक सहभागिता हुने अपेक्षा गरिएको छ।
कार्यक्रम बिहान ७ बजे सृजना चोकबाट सुरु भई नवदुर्गा प्राथमिक विद्यालय, खहरे हुँदै त्रिवेणी चोकसम्म सञ्चालन गरिनेछ।
दहचोक युवा समूहका सचिव जीवन कुमार गिरीका अनुसार यस सरसफाइ अभियानमा स्थानीय वडाबासी, नेपाल स्काउट, पूर्व सुरक्षाकर्मी, विभिन्न विद्यालय, स्थानीय क्लबहरू, तथा सहकारी संघ संस्थाहरूको सहभागिता सुनिश्चित गरिएको छ।
कार्यक्रमको व्यवस्थापन र सहकार्यमा चन्द्रागिरि नगरपालिका–१ नं. वडा कार्यालय दहचोकले पनि महत्वपूर्ण भूमिका निर्वाह गर्नेछ।
कार्यक्रमले वातावरणीय सरसफाइसँगै स्थानीय बासिन्दामा सरसफाइको महत्त्व र यसको दीर्घकालीन लाभबारे जनचेतना फैलाउने लक्ष्य राखेको छ। “हाम्रो उद्देश्य वातावरणमैत्री वडा निर्माण गर्ने र स्वस्थ, प्रदूषणरहित खोला–नाला व्यवस्थापनको आधार तयार गर्नु हो,” जीवन कुमार गिरीले बताए।
गिरीका अनुसार सरसफाइ अभियानले स्थानीय बासिन्दाहरूलाई एकताबद्ध गर्दै समुदायमा साझा उत्तरदायित्वको भावना सिर्जना गर्नेछ। उनले थपे, “स्वस्थ समुदायको निर्माणका लागि वातावरण स्वच्छ र प्रदूषणमुक्त हुनुपर्छ। खोला–नाला मात्र सफा गरेर पुग्दैन, त्यसको दीर्घकालीन व्यवस्थापन र संरक्षणमा सबैको सक्रिय सहभागिता आवश्यक छ।”
दहचोक युवा समूहले विगत १० वर्ष देखि एम्बुलेन्स सेवा र विभिन्न सामाजिक कार्य गर्दै आएकाे र आगामी दिनमा पनि यस्ता कार्यक्रमलाई निरन्तरता दिने योजना रहेको जनाएको छ। सरसफाइ अभियानले स्थानीय समुदायमा सकारात्मक सन्देश प्रवाह गर्दै सरसफाइलाई दैनिक जीवनशैलीको अभिन्न अंग बनाउने अपेक्षा गरिएको छ।समुहले स्थानीय समाजसेवी विद्यार्थी,दहचाेकबासीहरूलाई सामाजिक कार्यमा सहभागी जनाउन आग्रह समेत गरकाे छ ।
