काठमाडौँ, साउन १७ । काठमाडौँ प्रहरीले आपराधिक गतिविधि विरुद्ध सञ्चालन गरेको विशेष अपरेशन अन्तर्गत हालै महत्त्वपूर्ण कारबाही गरेको छ । जिल्ला प्रहरी परिसर काठमाडौँका प्रमुख प्रहरी वरिष्ठ उपरीक्षक (एसएसपी) विश्व अधिकारीका अनुसार काठमाडौँभरि गुण्डागर्दी नियन्त्रणका लागि व्यापक अपरेशन जारी छ ।
एसएसपी अधिकारीले भने, “गुण्डाहरूले अब टाउको उठाउने ठाउँ पाउने छैनन्, हाम्रो अपरेशन जारी छ । काठमाडौँमा यस्ता अवाञ्छित गतिविधि गर्नेहरूको नामावली संकलन भइसकेको छ र खोजीखोजी कारबाहीको दायरामा ल्याइँदैछ ।”
यही अपरेशन अन्तर्गत शुक्रबार काठमाडौँको महराजगञ्ज स्थित होटल साम्बालाबाट ४७ जना व्यक्तिहरू पक्राउ परेका थिए । ती मध्ये चर्चित गुण्डा चक्रे मिलन भनिने मिलन गुरुङ सहित १९ जनाविरुद्ध सार्वजनिक हितविपरीत गतिविधिमा संलग्न भएको आरोपमा मुद्दा दर्ता गरिएको छ र उनीहरूलाई सात दिनको म्याद थपेर अनुसन्धान थालिएको छ ।
अन्य २८ जनालाई भने हाललाई प्रहरीमा नियमित हाजिर हुने शर्तमा छोडिएको भए पनि उनीहरूमाथि पनि अनुसन्धान जारी रहेको एसएसपी अधिकारीले जानकारी दिए । उनका अनुसार “१९ जनामाथि अन्य उजुरीहरू पनि आउन सक्ने भएकाले सर्वसाधारणले चाहेमा थप उजुरी दिन सक्ने व्यवस्था गरिएको छ ।”
काठमाडौँ उपत्यका अपराध अनुसन्धान कार्यालयको सक्रिय सहयोगमा भइरहेको उक्त अपरेशनबाट राजधानीमा आपराधिक गिरोहहरूलाई ठुलो धक्का लागेको प्रहरीको दाबी छ । प्रहरीका अनुसार यस्ता अभियानलाई निरन्तरता दिँदै काठमाडौँलाई सुरक्षित र अपराधमुक्त बनाउने उद्देश्यसहित थप निगरानी र कारबाही गरिँदैछ ।
