स्तम्भन्युज सम्वाददाता खेम राज अधिकारी
काठमाडौं, भदौ २७ । नेपाल प्रहरीको केन्द्रीय अनुसन्धान ब्युरो (सिआइबी) ले लुटपाटमा परेका सामान फिर्ता गर्न अनुरोध गरेको छ। शुक्रबार एक विज्ञप्ति जारी गर्दै सिआइबीले लुटिएका वा चोरी गरिएका सामान फिर्ता नगरे कानूनी कारबाही हुने चेतावनी दिएको हो।
सिआइबीका अनुसार लुटिएका सामान नजिकैको सुरक्षा निकायमा बुझाउन सकिनेछ। साथै, यस्ता आपराधिक घटनामा संलग्न कसैको जानकारी भए तत्काल प्रहरीलाई सूचना दिन पनि आग्रह गरिएको छ।
ब्युरोले लुटिएका वा चोरीका सामानको किनबेच नगर्न सबैलाई सचेत गराउँदै, त्यस्तो गतिविधिमा संलग्न जोसुकैलाई कानूनी दायरामा ल्याइने स्पष्ट पारेको छ।
सिआइबीले जारी गरेको विज्ञप्तिमा भनिएको छ, “लुटपाट तथा आपराधिक क्रियाकलापलाई नियन्त्रण गर्न प्रहरी गम्भीर छ। कसैले लुटिएका सामान लुकाएर राखेको वा किनबेच गरेको पाइएमा कडा कारबाही हुनेछ।”
