६ आश्विन, काठमाडौं । यात्रुवाहक सार्वजनिक सवारी साधनका लागि आजदेखि देशभर ‘रुट परमिट’ खुला गरिएको छ। चाडपर्वको समयमा यात्रुहरूलाई सहज र सुव्यवस्थित रूपमा आवागमन गर्न सहयोग पुगोस् भन्ने उद्देश्यले नेपाल यातायात व्यवसायी राष्ट्रिय महासङ्घले यो व्यवस्था लागू गरेको हो।
महासङ्घका अध्यक्ष विजयबहादुर स्वाँरका अनुसार रुट परमिट खुला भएसँगै अब सार्वजनिक यातायात साधनले रुट नलिइकनै तोकिएका गन्तव्यसम्म जान पाउने छन्। तर, कुनै बाटोको विशेष प्रकृतिका कारण निषेध गरिएका आकार वा प्रकारका सवारी साधनमा भने बन्देज कायमै रहनेछ।
यो व्यवस्था आगामी असोज २२ गतेसम्म मात्र लागू रहने महासङ्घले जनाएको छ। साथै, सार्वजनिक सवारी साधन प्रयोग गर्ने यात्रुहरूले अनिवार्य रूपमा टिकट लिनुपर्ने पनि बताइएको छ।
यसअघि नै सरकारले खाद्यान्नलगायतका अत्यावश्यक वस्तु ढुवानी गर्ने सवारी बाहेकका ठूला ट्रेलर तथा कन्टेनरलाई पूर्णिमासम्म नारायणघाट–काठमाडौं खण्डमा सञ्चालन नगर्न निर्देशन दिइसकेको छ।
