काठमाडौँ । बागमती प्रदेशका मुख्यमन्त्री शालिकराम जमकट्टेल र लुम्बिनीका मुख्यमन्त्री जोखबहादुर महराले राजीनामा दिएका छन् ।
केन्द्रमा काङ्ग्रेस–एमाले गठबन्धनको नयाँ सरकार बनेसँगै अल्पमतमा परेका माओवादीका यी दुई मुख्यमन्त्रीले पद छोडेका हुन् ।
बागमतीका मुख्यमन्त्री जमकट्टेलले २०८१ साउन ६ गते आइतबार प्रदेश प्रमुख यादवचन्द्र शर्मासमक्ष राजीनामा बुझाए । मुख्यमन्त्रीसहित अन्य मन्त्रीहरूको उपस्थितिमा प्रमुख कार्यालय पुगेर प्रदेश प्रमुख शर्मा समक्ष राजीनामा बुझाएका हुन् ।
केन्द्रमा सत्ता समीकरण फेरिएसँगै अल्पमतमा रहेका उनले प्रदेशसभाबाट विश्वासको मत नपाउने निश्चित भएपछि राजीनामा दिएका हुन् । गत २०७९ पुस २५ मा जमकट्टेल मुख्यमन्त्रीमा नियुक्त भएका थिए ।
यता, लुम्बिनी प्रदेशका मुख्यमन्त्री जोखबहादुर महराले आज आफ्नो पदबाट राजीनामा दिएका छन् । लुम्बिनी प्रदेशसभाको आज बसेको बैठकलाई सम्बोधन गर्दै उनले मुख्यमन्त्री पदबाट राजीनामा दिएका हुन् ।
कुल ८७ प्रदेशसभा सदस्य रहेको लुम्बिनीमा एमालेका २९ र काग्रेसका २७ प्रदेशसभा सदस्य रहेका छन् ।
