काठमाडौं । प्रधानमन्त्री केपी शर्मा ओलीले प्रतिनिधिसभाको विश्वासको मतसम्बन्धी प्रस्ताव बहुमतले पारित भएको छ । मतदानमा कुल दुई सय ६३ सदस्यले भाग लिएका थिए ।
पक्षमा कूल १८८ मत परेको थियो भने विपक्षमा ७४ मत परेको थियो ।
प्रधानमन्त्री ओलीद्वारा नेपालको संविधान २०७२ को धारा ७६ को उपधारा (४) बमोजिम प्रतिनिधिसभाबाट विश्वास प्राप्त गर्न प्रतिनिधिसभा नियमावली, २०७९ को नियम १५५ बमोजिम राखेको प्रस्तावलाई बहुमतले पारित गरेको हो ।
बैठकमा भएको मतदानको परिणाम घोषणा गर्दै सभामुख देवराज घिमिरेले सभामा तत्काल कायम रहेको सङ्ख्याको बहुमतले सो प्रस्ताव स्वीकृत भएको जानकारी गराए ।
प्रधानमन्त्री ओलीलाई नेपाली कांग्रेस, नेकपा एमाले, जनता समाजवादी पार्टी, जनमत पार्टी, लोकतान्त्रिक समाजवादी पार्टी, नागरिक उन्मुक्ति पार्टी र केही स्वतन्त्र सांसदले मत दिएका छन् ।
नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, एकीकृत समाजवादी र राष्ट्रिय जनमोर्चाले विपक्षमा मत दिए भने नेपाल मजदुर किसान पार्टीका एक मात्र सांसद प्रेम सुवाल तटस्थ रहे ।
गत असार २८ गते एमालेका अध्यक्ष ओली प्रधानमन्त्रीमा नियुक्त भएका थिए । गत असार १७ गते कांग्रेस र एमालेबीच सात बुँदे सहमति भएको थियो ।
१२ सांसद अनुपस्थित
कुल २ सय ७५ सांसद रहेको प्रतिनिधिसभामा आइतबारको बैठकमा २ सय ६३ सांसदमात्रै उपस्थित रहेको सभामुख देवराज घिमिरेले जानकारी दिए। संसद् सचिवालयले दिएको जानकारी अनुसार, आइतबारको बैठकमा १२ जना सांसद अनुपस्थित रहे।
नेपाली कांग्रेसका ३, नेकपा माओवादी केन्द्रका १, राष्ट्रिय प्रजातन्त्र पार्टी राप्रपाका ३, राष्ट्रिय स्वतन्त्र पार्टी (रास्वपा) का १ र नेकपा एमालेका ३ जना (सभामुख र एक जना निलम्बित) सहित १२ जना सांसद अनुपस्थित रहेको संसद् सचिवालयले जनाएको छ ।
