काठमाडौं– काठमाडौं फोटोग्राफर संघको १६औं वार्षिक साधारण सभा शनिवार काठमाडौंमा सम्पन्न भएको छ । फोटोग्राफरहरुको हक, हित तथा व्यवसायिक फोटोग्राफीको विकासमा समर्पित संस्थाको रुपमा स्थापना भएको यो संघको वार्षिक साधारण सभा अध्यक्ष हरिप्रसाद घिमिरेको अध्यक्षतामा सम्पन्न भएको हो ।
काठमाडौं विश्वविद्यालय भाषा तथा आमसञ्चार विभागका प्रमुख निर्मलमणि अधिकारीको प्रमुख आतिथ्यमा सम्पन्न सभाको उद्घाटन कार्यक्रममा संस्थाका गतिविधि, उपलब्धि तथा भावी योजनाहरु प्रस्तुत गरिएका थिए ।
कार्यक्रममा फोटोग्राफी प्रतियोगिताका विजेतालाई पुरस्कृत गरिएको थियो । प्रतियोगितामा नन्दु श्रेष्ठले प्रथम, उत्सव पुडासैनीले दोस्रो तथा अमिर महर्जनले तेस्रो स्थान हासिल गरेका थिए । समारोहमा संघका नव गठित विभिन्न एरिया समितिहरुलाई पनि सम्मान पत्र तथा सहयोगी संस्थाहरुलाई कदर पत्र प्रदान गरिएको थियो ।
विभिन्न क्षेत्रका अतिथीहरुले शुभकमना प्रदान गरेको उक्त कार्यक्रममा शुभकामना मन्तव्य प्रदान गर्दै प्रमुख अतिथि अधिकारीले फोटोग्राफी इतिहास र समाजको ऐना रहेको र यसको व्यवसायिकतामा संघले सकारात्मक भूमिका खेलेको बताए ।
कार्यक्रममा स्वागत मन्तव्य संस्थाका उपाध्यक्ष आनन्द प्रभाकर घिमिरेले प्रदान गरेका थिए भने कार्यक्रमको सञ्चालन संस्थाका सचिव रेशमराज पण्डितले गरेका थिए ।
