- स्तम्भ न्युज
— खेम राज अधिकारी
२ असोज, काठमाडौं । आगामी फागुन २१ गतेका लागि घोषणा गरिएको प्रतिनिधि सभाको निर्वाचनलाई लक्षित गर्दै सरकारले मतदाता नामावलीमा नाम दर्ता गर्न समय थप्ने तयारी गरेको छ। यसका लागि सरकारले अध्यादेश मार्फत् कानुनी प्रावधानलाई परिमार्जन गर्ने भएको हो।
विद्यमान मतदाता नामावली ऐन अनुसार निर्वाचन मिति घोषणा भए पछि नयाँ नामावली संकलन गर्न रोक लगाइएको छ। तर आयोगले नयाँ मतदाताहरू लाई सहभागी गराउन समय आवश्यक रहेको भन्दै गृह मन्त्रालयसँग छलफल गर्दै आएको छ।
सोही सन्दर्भमा गृहमन्त्री ओमप्रकाश अर्याल र निर्वाचन आयोग बीच मंगलबार भेटवार्ता भएको थियो। भेटमा आयोगका कार्यवाहक प्रमुख आयुक्त रामप्रसाद भण्डारी सहित अन्य आयुक्तहरूको उपस्थिति थियो।
आयोगका प्रवक्ता नारायण प्रसाद भट्टराईका अनुसार, आयोग र मन्त्रालय बीच तोकिएको समयमा स्वच्छ, निष्पक्ष र भय रहित वातावरणमा निर्वाचन सम्पन्न गर्ने सहमति भएको छ। साथै, मतदाता नामावली संकलनका लागि कानुन संशोधन आवश्यक रहेको विषयमा पनि छलफल भएको उनले बताए।
‘निर्वाचन प्रभावकारी बनाउन नयाँ मतदाताको नामावलीमा नाम थप्न कानुनमा सुधार गर्न जरुरी देखिएको छ,’ प्रवक्ता भट्टराईले भने, ‘यसका लागि सरकार अध्यादेश मार्फत कानुनी बाटो खोल्ने तयारीमा छ।’
भेटवार्तामा विदेशमा रहेका नेपालीलाई मतदानको अधिकार दिने विषयमा पनि छलफल भएको थियो। तर आयोगले त्यसका लागि अझै गृहकार्य आवश्यक रहेको जनाएको छ।
गृहमन्त्री अर्यालले स्वतन्त्र र भय रहित वातावरणमा निर्वाचन गराउन आवश्यक सबै सहयोग उपलब्ध गराउने प्रतिबद्धता व्यक्त गरेका छन्। आयोगले पनि तोकिएको समयमा निर्वाचन गराउन आफू सक्षम र प्रतिबद्ध रहेको भन्दै सबै राजनीतिक दल र सरोकारवाला सँग समन्वय गरेर अघि बढ्ने जनाएको छ।
