९ जेठ,बुटवल । रुपन्देहीको बुटवल उप–महानगरपालिका वडा नं. ११ बुद्धनगरमा लागु औषध ब्राउन सुगरको कारोबार भइरहेको भन्ने गोप्य सूचनाका आधारमा प्रहरीले चार जनालाई पक्राउ गरेको छ।
२०८२ साल जेठ ७ गते राति करीब ११ बजे लागू औषध नियन्त्रण ब्यूरो शाखा कार्यालय भैरहवा र वडा प्रहरी कार्यालय बुटवल रुपन्देहीबाट खटिएको संयुक्त प्रहरी टोलीले चेकजाँच गर्ने क्रममा उनीहरूलाई पक्राउ गरिएको हो।
पक्राउ पर्नेमा बुटवल उप–महानगरपालिका वडा नं. ११ बुद्धनगरका २४ वर्षीय बिस्सु थापा, सोही उप–महानगरपालिका वडा नं. ७ शिवनगरका २४ वर्षीय सन्दिप सुनार, कपिलवस्तुको यसोधरा गाउँपालिका वडा नं. १ निवासी २९ वर्षीय विवेक चौधरी र कृष्णनगर नगरपालिका वडा नं. ९ का २० वर्षीय विपिन चौधरी रहेका छन्।
उनीहरूको साथबाट लुकाइछिपाई राखिएको अवस्थामा लागु औषध ब्राउन सुगर जस्तो देखिने ४ ग्राम ३८० मिलिग्राम पदार्थ र एक थान डिजिटल तराजु बरामद गरिएको प्रहरीले जनाएको छ।
बरामद सामग्रीसहित पक्राउ परेका चारै जनालाई आवश्यक अनुसन्धानको लागि रुपन्देही जिल्ला अदालतमा पेश गरिएकोमा अदालतले ७ दिनको म्याद थप गरी अनुसन्धान जारी राख्न आदेश दिएको छ। हाल इलाका प्रहरी कार्यालय बुटवलबाट आवश्यक अनुसन्धान कार्य अघि बढाइएको छ।
