काठमाडौं, २० चैत – नेपाल प्रहरीका केन्द्रीय प्रहरी प्रवक्ता प्रहरी नायव महानिरीक्षक (डीआईजी) दिनेश कुमार आचार्यले नेपाल पुलिस क्लब भृकुटीमण्डपमा सञ्चारकर्मीहरूसँग अन्तरक्रिया गर्दै हालैका अराजक घटनाक्रमबारे स्पष्ट पारेका छन्।
सञ्चारकर्मीहरूसँगको छलफलका क्रममा डीआईजी आचार्यले चैत १५ गते तीनकुने लगायतका स्थानमा भएका घटनाहरूको विषयमा धारणा व्यक्त गर्दै समाजमा भ्रामक सूचना फैलिन नदिन प्रहरीको तर्फबाट प्रयास भइरहेको जानकारी दिए। उनका अनुसार घटनाको वास्तविकता सार्वजनिक गर्नका लागि प्रहरी संयमित रहेको छ र कानूनी दायरामा रहेर कारबाही अगाडि बढाउने प्रतिबद्धता जनाएको छ।
भिडियो विश्लेषण र तथ्यगत जानकारी कार्यक्रममा सामाजिक सञ्जालमा प्रसारित विभिन्न भिडिओहरूको विश्लेषण गर्दै प्रहरीले घटनाको क्रमबद्ध विवरण प्रस्तुत गरेको थियो। डीआईजी आचार्यले भने, “हाम्रो उद्देश्य नागरिकलाई यथार्थ जानकारी दिनु हो, जसले गर्दा गलत सूचना र अफवाहलाई न्यून गर्न सकियोस्।”
प्रदर्शन र सुरक्षा उपायहरू प्रदर्शनको क्रममा निषेधित क्षेत्रमा प्रवेश गर्न खोज्ने प्रदर्शनकारीहरूलाई रोक्ने क्रममा प्रहरीले संयम अपनाएको र न्यूनतम बल प्रयोग गरिएको उनले स्पष्ट पारे। “कुनै पनि अराजक गतिविधि हुन नदिन र समाजमा शान्ति कायम गर्न कानुनी दायराभित्र रहेर मात्रै सुरक्षा उपायहरू अपनाइएको हो,” डीआईजी आचार्यले थपे।
समाजमा सुरक्षा सन्देश उनले सुरक्षाका सवालमा प्रहरी सदैव नागरिकहरूसँग रहेको बताउँदै समाजमा शान्ति र सुव्यवस्था कायम राख्नका लागि सबै पक्षहरू सचेत हुनुपर्नेमा जोड दिए। सञ्चारमाध्यमलाई पनि सत्यतथ्य खबर सम्प्रेषण गर्न आग्रह गर्दै उनले प्रहरी र सञ्चारकर्मीबीचको सहकार्य समाजलाई सही दिशामा लैजाने विश्वास व्यक्त गरे।
सञ्चारकर्मीहरूसँगको यो अन्तरक्रियाले हालै भएका घटनाहरूको यथार्थपरक जानकारी प्रवाह गर्न र प्रहरी प्रशासनको भूमिकाबारे स्पष्ट सन्देश प्रवाह गर्न मद्दत पुगेको छ।
