९ जेठ, धनुषा । “देशको आन्तरिक सुरक्षा मजबुत भए मात्रै विकास र समृद्धि सम्भव हुन्छ,” गृहमन्त्री रमेश लेखकले शुक्रबार मधेश प्रदेश स्तरीय सुरक्षा गोष्ठीलाई सम्बोधन गर्दै भने। नेपाल सरकारको गृहमन्त्रालय र मधेश प्रदेश सरकारको गृह, संचार तथा कानून मन्त्रालयद्वारा संयुक्त रूपमा धनुषामा आयोजित गोष्ठीमा मन्त्री लेखकले प्रदेशका सुरक्षासम्बन्धी चुनौती र समाधानबारे प्रस्ट पारे।
उनले प्रदेशभर फैलिँदै गएका लागूऔषध दुर्व्यसन, सवारी दुर्घटना, आत्महत्या र साइबर अपराधजस्ता घटनाहरू नियन्त्रण गर्न सरोकारवाला निकायहरूको समन्वय र सक्रियता अनिवार्य भएको बताए। “सीमा क्षेत्रमा भइरहेको तस्करी, चोरी निकासी र अन्य आपराधिक गतिविधिलाई कडाइका साथ नियन्त्रण गर्नुपर्छ,” उनले भने।
गोष्ठीमा मधेश प्रदेशका मुख्यमन्त्री सतिश कुमार सिंह, गृहमन्त्री राजकुमार लेखी, प्रमुख सचिव मदन भुजेल र विपद् जोखिम न्यूनीकरण प्राधिकरणका कार्यकारी प्रमुख ई. दिनेश प्रसाद भट्टलगायतले आ–आफ्ना धारणा राखे।
प्रहरी महानिरीक्षक दिपक थापाले मधेश प्रदेश खुला सिमाना भएको हुँदा सीमा अपराध, लागूऔषध ओसारपसार, साइबर अपराध, सवारी दुर्घटनालगायत चुनौतीहरू रहेको बताए। “हामी स्रोत, जनशक्ति र प्रविधिको अधिकतम प्रयोग गर्दै अघि बढ्न आवश्यक छ,” उनले स्पष्ट पारे।
गोष्ठीमा आठवटै जिल्लाका प्रमुख जिल्ला अधिकारीहरूले आ–आफ्नो जिल्लाको सुरक्षाको अवस्था, समस्या र समाधानका उपायबारे प्रस्तुतीकरण गरे।
कार्यक्रमको समापन गर्दै गृह सचिव गोकर्णमणि दुवाडीले गोष्ठीमा उठेका सुझाव र रणनीति कार्यान्वयनका लागि मन्त्रालय गम्भीर रूपमा प्रतिबद्ध रहेको बताए।
