काठमाडौं — नेपाल कम्युनिष्ट पार्टी (एमाले)को ५२ औं सचिवालय बैठकले संघीय लोकतान्त्रिक गणतन्त्र स्थापना दिवसको रूपमा जेठ १५ लाई विशेष उत्सवको रूपमा मनाउने निर्णय गरेको छ। पार्टी अध्यक्ष एवं प्रधानमन्त्री केपी शर्मा ओलीको अध्यक्षतामा बसेको बैठकले देशभर पार्टी कमिटीहरूलाई सक्रिय रुपमा तयारीमा जुट्न निर्देशन दिएको हो।
बैठकमा अध्यक्ष ओलीले समसामयिक राजनीतिक परिस्थिति र पछिल्ला घटनाक्रमबारे संक्षिप्त जानकारी गराएका थिए। त्यसक्रममा बैठकले सात दशक लामो बलिदानी र संघर्षबाट प्राप्त संघीय लोकतान्त्रिक गणतन्त्रको महत्त्वलाई जनस्तरसम्म पुर्याउने उद्देश्यसहित जेठ १५ लाई उत्सवका रूपमा मनाउने निर्णय गरेको एमालेले जनाएको छ।
उपत्यका बाहिरका लागि पालिका तहसम्मका पार्टी कमिटीहरूले विविध कार्यक्रम आयोजना गर्ने तयारी गरिएको छ भने काठमाडौं उपत्यकामा भने सांस्कृतिक झाँकीसहितको जनउत्सव आयोजना गरिनेछ।
पार्टीको प्रचार तथा प्रकाशन विभागका प्रमुख राजेन्द्र गौतमका अनुसार उक्त दिन आम नागरिकको उत्साहजनक सहभागिता सुनिश्चित गर्न व्यापक आह्वान गरिएको छ।
एमालेले मातहतका सबै कमिटीहरूलाई तयारीमा जुट्न निर्देशन दिँदै सो उत्सवलाई जनगणतन्त्रप्रति प्रतिबद्धता दोहोर्याउने अवसरका रूपमा उपयोग गर्न आग्रह गरेको छ।
