१४ जेठ,काठमाडौं । काठमाडौंको थानकोटमा २५ वर्षपछि पहिलोपटक नेपाल जेसीज क्षेत्र ‘ग’ को क्षेत्रीय सम्मेलन भव्य रूपमा हुने भएको छ। थानकोट जेसीजको रजत जयन्तीको अवसर पारेर जेठ १६ र १७ गते आयोजना हुने सम्मेलनको तयारी पूरा भएको सम्मेलन निर्देशक तथा नेपाल जेसीजका पूर्व कोषाध्यक्ष मोहनलाल डाँगीले जानकारी दिएका छन्।
सम्मेलनको उद्घाटन उद्योग वाणिज्य महासंघका अध्यक्ष चन्द्र ढकालले गर्ने कार्यक्रम रहेको छ। थानकोट जेसीजका संस्थापक अध्यक्ष सिनेटर नन्ददास अमात्यका अनुसार करिब ७ सय सहभागी हुने अनुमान गरिएको छ। उनले चन्द्रागिरिमा यस सम्मेलनले बहुआयामिक सकारात्मक प्रभाव पार्ने विश्वास व्यक्त गरे।
सम्मेलन सभापति तथा नेपाल जेसीजका राष्ट्रिय कार्यकारिणी उपाध्यक्ष कृष्ण सापकोटाले सम्मेलनलाई इतिहासमै स्मरणीय बनाउने अठोट लिएको बताए। राष्ट्रिय उपाध्यक्ष संगम कार्कीले कार्यक्रम ऐतिहासिक, सभ्य र भव्य हुने दाबी गरे।
थानकोट जेसीज अध्यक्ष विराज शाहीले सम्मेलनले सम्पूर्ण जेसीज युवाहरू र चन्द्रागिरि नगरपालिकाको पहिचानमा योगदान पुर्याउने बताए।
कार्यक्रममा वरिष्ठ अधिवक्ता तथा संविधानविद डा. भीमार्जुन आचार्य, कलाकार दीपकराज गिरी, ईगभरनेशनका प्रमुख दिपेश विष्ट सहभागी हुने ‘थिम सेमिनार’ पनि हुनेछ।
शुक्रबार शान्ति र्याली तथा पर्यटन प्रवर्द्धन कार्यक्रम आयोजना गरिनेछ भने पहिलो दिन थानकोट बजारदेखि कोटघरसम्म शान्ति र्याली, प्रकरण गोष्ठी र थानकोट नाइट सहित नेवारी परिकारको स्वाद दिइनेछ।
दोस्रो दिन चन्द्रागिरि हिल्स, दहचोकस्थित ईन्द्रः कालुपाण्डे समाधिस्थल अवलोकन भ्रमण गरिनेछ। बैठक संसदीय प्रणालीबाट सञ्चालन हुनेछ।
कार्यक्रममा व्यक्तित्व विकास प्रतियोगिता, व्यापार प्रवर्द्धन, “समाजमा जेसीज किन” भन्ने विषयमा प्रशिक्षण लगायत विभिन्न युवा लक्षित सत्रहरू हुनेछन्। राष्ट्राध्यक्ष रजनी थापा लगायत पदाधिकारीहरूको उपस्थिति रहनेछ।
साधारण नागरिकले १५ सय रुपैयाँ शुल्कमा ‘भिजिटर पास’ मार्फत सहभागिता जनाउन सक्नेछन् भने जेसीज सदस्यहरूका लागि खानपान र आवासको व्यवस्था आयोजकले गर्नेछ। विजनेस पार्टनरलाई मायाको चिनो प्रदान गरिनेछ भने सोही अवसरमा ‘शोनितपुर स्मारिका’ विमोचन गरिने छ।
सम्मेलनले युवा नेतृत्व, व्यक्तित्व विकास तथा चन्द्रागिरिको आर्थिक, सामाजिक र पर्यटन क्षेत्रको प्रवर्द्धनमा उल्लेखनीय योगदान पुर्याउने विश्वास आयोजकले लिएका छन्।
तस्बिरहरू :
