काठमाडौं, साउन ५ — निर्देशक ऋषि लामिछानेको निर्देशनमा तयार भएको बहुप्रतिक्षित सिनेमा **‘माग्ने राजा’**को दोस्रो गीत सार्वजनिक गरिएको छ।
आगामी भदौ ६ गतेबाट देशभर प्रदर्शनमा आउन लागेको बहुप्रतिक्षित फिल्म **‘माग्ने राजा’**को दोस्रो गीत ‘सुतेर उठेको पैसामा’ सार्वजनिक गरिएको हो ।
ललितपुरको लबिम मलमा आयोजित विशेष कार्यक्रममार्फत सार्वजनिक गरिएको गीतमा मुख्य कलाकार **केदार प्रसाद घिमिरे (माग्ने बुढा)**लाई धनाढ्य अवतारमा प्रस्तुत गरिएको छ। गीतमा उनका साथमा विल्सन विक्रम राई (तक्मे बुढा) र बाल कलाकार रोनिश खड्का पनि फिचर भएका छन्।
💬 गीतमा धनाढ्य पात्रको रमाइलो बर्णन
बाबुल गिरीको शब्द, संगीत र स्वरमा तयार भएको यस गीतमा बाल गायक रोनिश खड्काको स्वर समेत रहेको छ। गीतको अडियो सहजै मुखमा झुन्डिने खालको छ भने भिडियोमा केदार घिमिरेलाई पैसामै हिँडेको, पैसामै सुतेको र हेलिकप्टर चढेको शैलीमा देखाइएको छ।
फिल्मका लेखक सामिप्यराज तिमिल्सिनाका अनुसार, “फिल्म नै पैसाको वरिपरि घुम्ने कथा हो, र गीतलाई पनि त्यसअनुसार तयार पारिएको हो।”
गीतको कोरियोग्राफी गम्भीर विष्टले गरेका हुन्। भिडियोलाई रमाइलो, हाँस्य र भव्य दृश्य संयोजनमार्फत प्रस्तुत गरिएको छ।
ऋषि लामिछानेको निर्देशनमा तयार भएको फिल्म मुनाल घिमिरेको प्रस्तुतिमा आरम्भ प्रोडक्सनको व्यानरमा निर्माण गरिएको हो। फिल्मका निर्माता मधुसूदन शर्मा, डीओपी नरेन्द्र मैनाली, र सम्पादक मित्र डी गुरुङ हुन्।
फिल्ममा केदार घिमिरे, वर्षा सिवाकोटी, विल्सन विक्रम राई, शिशिर वाङ्देल, शारदा गिरी, राधिका कँडेल, मिस पबीलगायत कलाकारहरूको अभिनय रहेको छ।
फिल्ममा दीपक शर्मा र बाबुल गिरीको संगीत, कविराज गहतराज र गम्भीर विष्टको कोरियोग्राफी तथा रोशन श्रेष्ठको एक्सन रहेको छ। यसअघि सार्वजनिक गरिएको फिल्मको टिजरले दर्शकबाट सकारात्मक प्रतिक्रिया पाइरहेको निर्माण पक्षले जनाएको छ।
