काठमाडौं, साउन ६ — संघीय संसद् अन्तर्गतको राष्ट्रिय सभाको बैठक आज दिउँसो १:१५ बजे संघीय संसद् भवन, नयाँ बानेश्वरमा बस्ने भएको छ। आजको बैठकमा दुई महत्वपूर्ण विधेयकमाथि छलफल सुरु हुने कार्यसूची तय गरिएको छ।
संघीय मामिला तथा सामान्य प्रशासनमन्त्री भगवती न्यौपाने ले प्रतिनिधिसभाबाट सन्देशसहित प्राप्त ‘संघीय निजामती सेवा विधेयक, २०८०’ लाई दफावार छलफलका लागि विधायन व्यवस्थापन समितिमा पठाउने प्रस्ताव बैठकमा प्रस्तुत गर्नुहुनेछ।
त्यसैगरी, गृहमन्त्री रमेश लेखक ले प्रतिनिधिसभाबाट आएको ‘नेपाल नागरिकता (दोस्रो संशोधन) विधेयक, २०८१’ पनि दफावार छलफलका लागि सोही समितिमा पठाउने प्रस्ताव प्रस्तुत गर्नेछन्।
बैठकमा भौतिक पूर्वाधार तथा यातायात मन्त्रालय र गृह मन्त्रालयसँग सम्बन्धित मौखिक प्रश्नहरूमा सम्बद्ध मन्त्रीहरूले उत्तर दिने कार्यसूची पनि रहेको छ।
यसैबीच, प्रतिनिधिसभा मातहतका तीन संसदीय समितिहरूको बैठक पनि आजै बस्दैछ। तीमध्ये कानुन, न्याय तथा मानव अधिकार समितिले ‘विश्वव्यापी आवधिक समीक्षासम्बन्धी विषयमा राष्ट्रिय मानव अधिकार आयोगसँग छलफल गर्ने’, महिला तथा सामाजिक मामिला समितिले ‘वैदेशिक रोजगारीमा रहेका महिला कामदारको अवस्थाबारे छलफल गर्ने’ र शिक्षा, स्वास्थ्य तथा सूचना प्रविधि समितिले ‘मिडिया काउन्सिल विधेयकमा संशोधनकर्तासँग छलफल गर्ने’ कार्यसूची तय गरेका छन्।
शिक्षा समितिमा सो विधेयकबारे पछिल्ला केही दिनदेखि निरन्तर छलफल चलिरहेको छ।
