स्तम्भन्युज संवाददाता
३० भदौ, काठमाडौं । सरकारले हालै सम्पन्न जेनजी आन्दोलनमा निधन भएकामध्ये सहिदलाई राष्ट्रिय सम्मानसहित श्रद्धाञ्जली अर्पण गर्ने र सहिद परिवारलाई १५ लाख रुपैयाँ सहयोग गर्ने निर्णय गरेको छ।
भदौ ३० गते सोमबार बसेको नवगठित मन्त्रिपरिषद्को पहिलो बैठकले आगामी असोज १ गते शोक दिवसको रूपमा मनाउने र सार्वजनिक बिदा दिने निर्णय गरेको गृहमन्त्री ओमप्रकाश अर्यालले जानकारी दिनुभयो।
सरकारले सहिद परिवारलाई पूर्व निर्धारित क्षतिपूर्ति १० लाखसहित थप ५ लाख गरी कुल १५ लाख सहयोग गर्नेछ। उक्त रकम अर्थ मन्त्रालयमार्फत गृह मन्त्रालयलाई उपलब्ध गराइने र सम्बन्धित जिल्ला प्रशासन कार्यालयमार्फत परिवारलाई हस्तान्तरण गरिनेछ।
बैठकले आन्दोलनका क्रममा सहादत प्राप्त गर्नेलाई राष्ट्रिय झण्डा ओढाएर अन्त्येष्टि गर्ने, घाइतेको निःशुल्क उपचार गर्ने, शव स्थानान्तरण र दाहसंस्कारमा सरकारी सहयोग गर्ने व्यवस्था गर्ने निर्णय पनि गरेको छ।
त्यस्तै, आन्दोलनका क्रममा भएको जनधनको क्षति तथा सुरक्षाकर्मीको ज्यादतीबारे छानबिन गर्न पूर्वन्यायाधीशको संयोजकत्वमा उच्चस्तरीय जाँचबुझ आयोग गठन गर्ने सैद्धान्तिक निर्णय भएको छ। आयोगको प्रतिवेदनका आधारमा आवश्यक कारबाही अघि बढाइने गृहमन्त्री अर्यालले बताउनुभयो।
साथै, सहिदको स्मरणमा “जेनजी जागरण स्मारक पार्क” निर्माण गर्ने निर्णय भएको छ।
बैठकले अघिल्लो मन्त्रिपरिषद्का निर्णय नभएका प्रस्तावहरू सम्बन्धित मन्त्रालयमा फिर्ता पठाउने निर्णयसमेत गरेको छ।
