- स्तम्भन्युज
— खेम राज अधिकारी
स्तम्भन्युज अनलाइन खबर
काठमाडौँ, असोज १४। दसैँ नजिकिँदै जाँदा राजधानी काठमाडौँ उपत्यकाबाट गाउँ फर्किनेको चाप दिन प्रतिदिन बढ्दै गएको छ। घटस्थापनादेखि आजसम्मका आठ दिनमा मात्र पाँच लाख ५३ हजार २६१ जनाले उपत्यका छाडिसकेको उपत्यका ट्राफिक प्रहरी कार्यालयले जनाएको छ।
पछिल्लो २४ घण्टामै ८५ हजार २८४ जनाले उपत्यका छाडेका छन्। त्यस्तै, सो अवधिमा १७ हजार दुई सवारीसाधन उपत्यकाबाट बाहिरिएका छन्। घटस्थापनादेखि आजसम्म उपत्यकाबाट बाहिरिएका सवारीसाधनको कुल सङ्ख्या एक लाख ८९ हजार पुगेको छ। यात्रुको मुख्य गन्तव्य पूर्व, पश्चिम र सुदूरपश्चिमका जिल्ला रहेका छन्।
उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक नवराज अधिकारीका अनुसार यात्रुको सहजता र सुरक्षाका लागि विभिन्न नाकामा थप ट्राफिक प्रहरी परिचालन गरिएको छ। उहाँले सहायता कक्ष, अनुगमन टोली र आपत्कालीन उद्धार टोली सक्रिय रूपमा खटिएको बताउनुभयो।
ट्राफिक प्रहरीले विशेषगरी लामो दूरीका सवारी चालकलाई मादकपदार्थ सेवन नगर्न, निर्धारित गतिमा सवारीसाधन चलाउन र प्राविधिक अवस्था अनिवार्य जाँच गर्न आग्रह गरेको छ।
यता, उपत्यकामा भने ७२ हजार ४१ सवारीसाधनमार्फत दुई लाख ८५ हजार ३०८ जना भित्रिएका छन्। कोटेश्वर, कलङ्की, बल्खु, नयाँबसपार्क र जगतीलगायतका नाकामा यात्रुको भीड देखिएको छ।
सार्वजनिक यातायात बाहेक निजी सवारीसाधन र पर्यटक बसमार्फत यात्रा गर्नेहरूको संख्यामा समेत उल्लेख्य वृद्धि भएको छ। राजधानीमा भने यात्रु बाहिरिन थालेसँगै सडक चाप घटेर तुलनात्मक रूपमा फुर्सदिलो देखिन थालेको छ।
