काठमाडौं, श्रावण ३१ । आज नेपालभर कृष्ण जन्माष्टमी पर्व धुमधामका साथ मनाइँदैछ । भगवान् श्रीकृष्णको जन्मोत्सवका अवसरमा भक्तजनले विहानैदेखि व्रत, पूजा र भजनकीर्तन गर्दै धार्मिक आस्था प्रकट गरिरहेका छन् ।
विशेषगरी पाटन दरबार क्षेत्रको ऐतिहासिक कृष्ण मन्दिरमा बिहानै देखि भक्तजनको ठूलो भीड लागेको छ । शिल्पकला र वास्तुकलाको अद्वितीय नमुनाका रूपमा रहेको पत्थरको यो मन्दिर मल्लकालीन राजा सिद्धिनरसिंह मल्लले १७औँ शताब्दीमा निर्माण गराएका थिए । यसलाई नेपालकै सर्वोत्कृष्ट कृष्ण मन्दिर मानिन्छ ।
आजको दिन मन्दिर वरपर विशेष सजावट गरिएको छ भने भक्तजनले लामबद्ध भएर कृष्ण भगवानलाई दूध, फलफूल, फूल र तुलसी अर्पण गर्दै पूजा गरिरहेका छन् । बेलुकी भजनकीर्तन, गीता पाठ तथा धार्मिक सांस्कृतिक कार्यक्रम समेत आयोजना हुने जानकारी मन्दिर व्यवस्थापन समितिले दिएको छ ।
कृष्ण जन्माष्टमीका अवसरमा भक्तजनले व्रत बसेर सत्य, धर्म र सदाचारको मार्गमा लाग्ने संकल्प गर्ने परम्परा छ । भगवान् कृष्णलाई धर्मसंस्थापक र गीता उपदेशकका रूपमा मानिन्छ ।
काठमाडौं, भक्तपुर, ललितपुर सहित देशका विभिन्न मठ मन्दिरमा आज विशेष पूजा, भजनकीर्तन र धार्मिक कार्यक्रम हुँदैछन् ।
