- स्तम्भन्युज
— खेम राज अधिकारी
१२ असोज, नेपालगञ्ज । जेन–जी आन्दोलन पश्चात नेपालगञ्ज स्थित यातायात व्यवस्था विभागको सेवा कार्य पूर्ण रूपमा प्रभावित भएको छ । विभागका लेखा प्रमुख दिनेश सिंह ठाकुरका अनुसार अहिले ब्लुबुक नवीकरण, रुट परमिट, सवारी जाँचपास र अस्थायी पत्रके बाहेक अन्य सम्पूर्ण कामकाज रोकिएका छन् ।
उनले भोलि असोज १३ गते देखि असोज १९ गतेसम्म कार्यालय पूर्ण रूपमा बन्द रहने जानकारी दिए । “दशैं पश्चात शान्तिनगरमा रहेको कार्यालयलाई कारकादो स्थित सिप विकास कार्यालयको भवनमा सार्ने तयारी भइरहेको छ,” ठाकुरले बताए ।
सम्पूर्ण रेकर्ड जलेर नष्ट
भदौ २३ र २४ गतेको आन्दोलनका क्रममा कार्यालयमा आगजनी हुँदा सम्पूर्ण कागजात जलेर नष्ट भएका छन् । विशेषगरी चालक अनुमतिपत्र (लाइसेन्स) सम्बन्धी सम्पूर्ण विवरण, फाइल र कम्प्युटरमा भएका डाटा समेत काम नलाग्ने अवस्थामा पुगेको ठाकुरले बताए ।
“सबै कागजपत्र जलाईदिएको छ, लाइसेन्सको सम्पूर्ण रेकर्ड हराएको छ, यसले सेवा पुनःसञ्चालनमा ठूलो समस्या खडा गरेको छ,” उनले भने ।
सरकारी गाडी समेत जलेर नष्ट
कार्यालयको सम्पत्ति पनि पूर्ण रूपमा क्षतिग्रस्त भएको छ । आगजनीमा कार्यालय प्रयोगमा रहेका सरकारी गाडी समेत जलेर नष्ट भएको छ ।
सेवा ग्राही प्रभावित
कार्यालय बन्द भएपछि दैनिक रूपमा ब्लुबुक नवीकरण, सवारी दर्ता, रुट परमिट र नयाँ लाइसेन्स लिन आउने सयौं सेवाग्राही प्रभावित भएका छन् । उनीहरूले आवश्यक कामका लागि अन्यत्र धाउनुपर्ने बाध्यता परेको छ ।
स्थानान्तरणपछि मात्र नियमित सेवा
लेखा प्रमुख ठाकुरका अनुसार दशैं पश्चात कार्यालयलाई नयाँ स्थानमा स्थानान्तरण गरी, आवश्यक कागजात र प्रणाली पुनःसंरचना गरेपछि मात्र नियमित सेवा सञ्चालनमा ल्याउने योजना छ । तर सम्पूर्ण रेकर्ड जलेर नष्ट भएकाले सेवाग्राहीलाई तत्काल राहत दिने उपायमा चुनौती खडा भएको जनाइएको छ ।
