माघ ४, काठमाडौं । प्रतिनिधिसभा निर्वाचनका लागि काठमाडौं निर्वाचन क्षेत्र नम्बर ९ बाट पहिलो नम्बरमा सिफारिस भएका राष्ट्रिय जनमोर्चाका युवा नेता रोसन दानी सिफारिस सूचीबाट बाहिरिएका छन् । राष्ट्रिय जनमोर्चा काठमाडौं जिल्ला समितिले तीन जना उम्मेदवारको नाम काटेर केन्द्रमा पठाएसँगै दानीको नाम पनि हटाइएको हो ।
उक्त क्षेत्रमा दोस्रो नम्बरमा सिफारिस भएका राष्ट्रिय जनमोर्चाका युवा नेता तथा संकटा युवा क्लबका केन्द्रीय सदस्य वीरेन्द्र महर्जनको नाम पनि जिल्लाबाट काटिएको छ । महर्जन काठमाडौं महानगरपालिका–२२ टेवाहालका स्थानीय समाजसेवी हुन् ।
यसैगरी नेपाल पत्रकार महासंघ काठमाडौं जिल्ला सदस्य लक्ष्मण बेलबासे पनि अन्तिम सिफारिस सूचीबाट बाहिरिएका छन् ।
राष्ट्रिय जनमोर्चाका एक नेताका अनुसार काठमाडौं–९ बाट उम्मेदवारीका आकांक्षी धेरै भएपछि पहिलो नम्बरमा सिफारिस भएका रोसन दानीसहित तीन जनाको नाम काटेर केन्द्रमा पठाइएको हो ।
राजमोका एक नेताले जानकारी दिएअनुसार केन्द्रमा पठाइएको अन्तिम नाममा राष्ट्रिय जनमोर्चा काठमाडौं जिल्ला अध्यक्ष झविलाल (झविन्द्र) बेलबासे र युवा व्यवसायी तथा अखिल नेपाल राष्ट्रिय उद्योग व्यापार संघका केन्द्रीय कोषाध्यक्ष एवं उपत्यका स्तरीय समितिका अध्यक्ष बिबी अधिकारी रहेका छन् ।
स्रोतका अनुसार काठमाडौं निर्वाचन क्षेत्र नम्बर ९ बाट बिबी अधिकारीलाई राष्ट्रिय जनमोर्चाले टिकट दिने उच्च सम्भावना रहेको छ । अधिकारी काठमाडौं चन्द्रागिरि नगरपालिका–१५ का सामाजिक अभियन्ता तथा युवा व्यवसायी हुन् ।
