— खेम राज अधिकारी
स्तम्भन्युज खबर
१९ फागुन,काठमाडौँ । वसन्त ऋतु सुरु भएसँगै उपत्यकाका विभिन्न स्थानमा चेरीका फूल फुल्न थालेपछि राजधानीको सौन्दर्य झनै निखारिएको छ । सडक किनार, पार्क र सार्वजनिक स्थानहरू गुलाबी र सेतो रंगका चेरी फूलले ढाकिँदा वातावरण रमणीय बनेको छ।
पार्क, बगैंचा वा सडकछेउका चेरीका रूखहरू फूलले ढाकिँदा त्यहाँ पुग्ने हरेक मानिसको मन प्रफुल्लित बनाएको देख्न सकिन्छ । पैदलयात्रीहरू मात्रै होइन, गाडीमा हुइँकनेहरू पनि चेरी फूलसँगै सेल्फी खिचेर रमाउने गरेको भेटिन्छन् ।
वसन्त ऋतुमा फूल्ने चेरी जापानको राष्ट्रिय फूल पनि हो । जापानमा यसलाई साकुरा भनेर पनि चिनिन्छ ।
लैनचौर लगायत काठमाडौं उपत्यकाका विभिन्न ठाउँमा यो फूल फुलेका कारण काठमाडौं शहरको सुन्दरता पनि बढाएको छ ।
विशेषगरी काठमाडौं महानगरपालिकाले केही वर्षयता विभिन्न स्थानमा रोपिएका चेरीका बिरुवाहरू अहिले फुलेर ढकमक्क भएका छन्। बिहान–साँझ हिँडडुल गर्ने सर्वसाधारण तथा युवायुवतीहरू चेरी फूलसँग तस्बिर खिच्न व्यस्त देखिन्छन्।
पर्यावरणविद्हरूका अनुसार चेरीका फूलले शहरको हरियाली मात्र बढाएको छैन, मनोवैज्ञानिक रूपमा पनि सकारात्मक प्रभाव पार्ने गर्दछ। वसन्तको आगमनसँगै फुल्ने चेरीले राजधानीवासीलाई नयाँ ऊर्जा र उमंग प्रदान गरेको उनीहरूको भनाइ छ।
स्थानीय तहले पनि हरित शहर निर्माण अभियानअन्तर्गत यस्ता सौन्दर्यवर्द्धक बिरुवा रोप्नेलाई प्राथमिकता दिँदै आएको जनाएको छ। चेरी फुल्दा बढेको आकर्षणले आन्तरिक पर्यटन प्रवर्द्धनमा समेत टेवा पुग्ने अपेक्षा गरिएको छ।
