राति १० बजेबाट सेना परिचालन, नेपाली सेनाको विज्ञप्ति

काठमाडौं, भदौ २४ । देशभर चर्किएको आन्दोलन नियन्त्रणमा गर्न राति १० बजेबाट नेपाली सेना परिचालन हुने भएको छ। सेनाले सोमबार साँझ विज्ञप्ति जारी गर्दै राति १० बजेदेखि सक्रिय रुपमा परिचालन हुने जानकारी दिएको हो।

जेनजी आन्दोलनका क्रममा राजधानी उपत्यकासहित विभिन्न शहरमा तोडफोड र आगजनी तीव्र बनेपछि सरकारले सुरक्षा अवस्था सुदृढ पार्न सेना उतार्ने निर्णय गरेको हो।

सेनाको विज्ञप्तिमा भनिएको छ, “जनताको ज्यान र सम्पत्ति सुरक्षित राख्ने दायित्वअन्तर्गत नेपाली सेना आवश्यक स्थानमा सक्रिय हुनेछ।”

यसअघि आन्दोलनकारीहरूले सरकारी कार्यालय, पार्टी मुख्यालय र नेताहरूको निवासमा तोडफोड तथा आगजनी गरेका थिए। प्रहरीको प्रयास मात्र पर्याप्त नभएको भन्दै अब सेनालाई समेत परिचालन गरिएको हो।

सुरक्षा निकायले राति १० बजेदेखि कर्फ्यू आदेश जारी हुन सक्ने सम्भावना औंल्याएको छ।