काठमाडौं । नेपालीलाई रुसी सेनामा पठाएको आरोपमा प्रहरीले १२ जनालाई पक्राउ गरेको छ ।
अवैध रुपमा रुसी सेनामा भर्ती भएर ६ जना नेपालीले ज्यान गुमाएपछि प्रहरीले दलालहरूको खोजी सुरु गरेको थियो । त्यसक्रममा मंसिर १४ गते ११ जना र १८ गते एक जना गरी १२ जना पक्राउ परेका हुन् ।
काठमाडौं प्रहरी परिसरका अनुसार दिपेन परियार, क्षितिज गिरी, शुभास लामा, मनिष न्यौपाने, रोजल महर्जन, हरिबहादुर विश्वकर्मा, ईश्वर अधिकारी, गोकर्ण अर्याल, सुजता रावल, सन्तोष रोका, सन्तोष नेपाल र द्रोण डाँगी पक्राउ परेका हुन्।
उनीहरुविरुद्ध प्रहरीले अनुसन्धानका लागि म्याद थपसमेत गरिसकेको छ।
रुस र युक्रेनबीच जारी युद्धका क्रममा रसियन सेनामा भर्ती भएका ६ जना नेपालीले ज्यान गुमाइसकेका छन् । गोरखाका सन्दीप थपलिया, पुतलीबजार–५, स्याङ्जाका पितम कार्की, मेला–६, दोलखाका राजकुमार रोका, इलाम–५, इलामका गंगाराज मोक्तान, वाणगंगा–१, कपिलवस्तुका रूपक कार्की र पोखरा, कास्कीका देवान राईको मृत्यु भएको परराष्ट्र मन्त्रालयले जनाएको छ ।
परराष्ट्रका अनुसार एक नेपाली युक्रेनी सेनाको नियन्त्रणमा रहेका छन् ।
अवैध रुपमा रुसी सेनामा नेपालीहरू भर्ती भएर मारिएको जानकारीपछि सरकारले रुसलाई कूटनीतिक नोट पठाउँदै नेपाली नागरिकलाई सेनामा भर्ना नगर्न र भर्ती भइसकेकालाई पनि तत्काल नेपाल पठाउन अनुरोध गरेको छ।
