खिमराज चालिसे ।
बलसाड (गुजरात) । भारतको गुजरात बलसाडस्थित एउटा अपार्टमेन्टमा कार्यरत नेपाली मजदुरलाई सोही अपार्टमेन्टका सेक्रेटरी निर्घात कुटपिट गरेपछि मूल प्रवाह अखिल भारत नेपाली एकता समाजले बलसाड जिल्ला कलेक्टरलाई ज्ञापनपत्र बुझाएको छ ।
मूल प्रवाहको पश्चिम भारत क्षेत्रीय समितिका सदस्य वेदबहादुर कार्की, केन्द्रीय सदस्य गोविन्दबहादुर थापा र बलसाडको चला एरिया समितिका अध्यक्ष नवीनबहादुर चलाउने सम्मिलित प्रतिनिधि मण्डलले जुन ५, २०२४ का दिन जिल्ला कलेक्टर ए.आर. झालाई ज्ञापन बुझाइएको हो ।
उक्त ज्ञापन गुजरात प्रदेश सरकारका गृहमन्त्रालय, जिल्लाका पुलिस कमिस्नर र वापीका डेपुटी एसपीलाई समेत पठाइएको छ ।
घटनाक्रमअनुसार जुन २९ का दिन बलसाडको चला एरियास्थित अपार्टमा चौकिदारी गर्ने गेरुवा–४ गिद्धपुर बर्दियाका प्रेमबहादुर चलाउने र मङ्गलसेन अछामका मनोज योगेन्द्र रावलको माझमा केही विवाद भएको थियो । उक्त विवादलाई अन्य नेपालीले सम्झाई बुझाई साम्य पारेका थिए तर अपार्टमेन्ट रेजिडेन्ट सोसाइटीका सेक्रेटरी बिहारीलाल चादमल खत्रीले मामिलालाई अरू जटिल बनाए ।
सेक्रेटरी खत्रीले मनोज रावलसित सोधपुछ गरे । त्यति मात्र होइन, उनले अपार्टमेन्टका अर्का निवासी शङ्करभाइ सोमाभाइ पटेललाई लिएर राती ११ः३० बजे कोठामा सुतिरहेका प्रेमबहादुरलाई कुटपिट गरे । कुटपिटबाट बेहोस भएका प्रेमबहादुरलाई सिलवासाको अस्पतालमा भर्ना गर्नुपर्यो । उनको अवस्था अहिले पनि गम्भीर छ ।
मूल प्रवाहले प्रहरीले गिरफ्तार गरेका मनोज योगेन्द्र निर्दोष भएकाले छोडिदिन तथा कुटपिटमा संलग्न बिहारीलाल र शङ्करभाइमाथि कडा कानुनी कारबाही गर्न माग गरिएको छ ।
