- स्तम्भन्युज
— खेम राज अधिकारी
स्तम्भन्युज खबर
१८ फागुन, काठमाडौँ । आसन्न निर्वाचनलाई व्यवस्थित र शान्तिपूर्ण रूपमा सम्पन्न गर्न आजदेखि देशभरका सबै मतदान केन्द्रमा कर्मचारी र सुरक्षाकर्मी खटिन सुरु भएको छ।
निर्वाचन आयोग का अनुसार मतदान सामग्रीसहित खटिने कर्मचारीहरू सम्बन्धित केन्द्रतर्फ प्रस्थान गरिसकेका छन्। दुर्गम तथा पहाडी जिल्लामा आवश्यक सामग्री समयमै पुगोस् भन्ने उद्देश्यले प्राथमिकताका आधारमा ढुवानी व्यवस्था मिलाइएको छ।
‘सोमबार बेलुकीसम्म सबै ठाउँका मतदान केन्द्रहरुमा कर्मचारी र सुरक्षाकर्मीहरुको टोली पुग्नुपर्छ भनेर हामीले यसअघि नै निर्देशन दिइसकेका छौं’ निर्वाचन आयोगका प्रवक्ता नारायणप्रसाद भट्टराईले भने, ‘निर्वाचन सामग्री पुगेर मतदान केन्द्रमा पुग्ने उनीहरुले सोमबार नै केही कामहरु समेत गर्नुपर्ने हुन्छ ।’
मतदान केन्द्रमा खटिने कर्मचारीमा मतदान अधिकृत, सहायक मतदान अधिकृत तथा अन्य सहयोगी कर्मचारी रहेका छन्। उनीहरूलाई मतदान प्रक्रिया, मतदाता परिचय, मतपत्र व्यवस्थापन तथा सुरक्षा सतर्कताबारे आवश्यक तालिम दिइसकिएको आयोगले जनाएको छ।
मतदान अधिकृतको जिम्मामा रहने मतपत्र लगायतका निर्वाचन सामग्रीहरुलाई नेपाल प्रहरीले सुरक्षा दिएको हुन्छ । निर्वाचन आयोग र प्रहरी हेडक्वाटरले सुरक्षाकर्मीहरुलाई मतदान अधिकृत लगायतका कर्मचारी र सिलबन्दी गरिएका मतपत्र लगायतका सामग्रीलाई नछाड्नु र २४ सै घण्टा निगरानी गर्नु भनेर निर्देशन दिएको छ ।
सुरक्षाका लागि नेपाल प्रहरी, सशस्त्र प्रहरी बल र आवश्यकता अनुसार नेपाली सेनासमेत परिचालन गरिएको छ। संवेदनशील र अति संवेदनशील केन्द्रहरूमा थप सुरक्षा व्यवस्था कडा पारिएको बताइएको छ।
आयोगले मतदातालाई निर्धक्क र उत्साहका साथ मतदानमा सहभागी हुन आग्रह गर्दै मतदानको दिन तोकिएको समयभित्र आफ्नो मतदान केन्द्रमा पुग्न अनुरोध गरेको छ।
