काठमाडौँ । नेपाली काङ्ग्रेस र नेपाल कम्युनिस्ट पार्टी (एमाले) बिच यही असार १७ गते नयाँ सहमतिसँगै राष्ट्रिय राजनीति तरङ्गित भएको छ । प्रतिनिधि सभाको आइतबार र सोमबार सम्पन्न बैठकमा सांसदले गीतमार्फत बिम्ब प्रहार गरिरहेका छन् ।
एमालेले आफ्ना मन्त्रीहरूको राजीनामा बुझाउन प्रधानमन्त्री निवास बालुवाटार जाँदा प्रधानमन्त्री पुष्पकमल दाहालले गायक फत्तेमानराज भण्डारीको एउटा गीतको हरफ एमालेका मन्त्रीहरूलाई सुनाएका थिए– “यस्तो पनि हुँदो रै’छ जिन्दगीमा” ।
सोही प्रसङ्ग उल्लेख गर्दै एमालेका प्रमुख सचेतक महेशकुमार बर्तौलाले प्रतिनिधि सभाको आजको बैठकमा जवाफी गीत सुनाउनुभयो ।
बैठकको विशेष समयमा प्रमुख सचेतक बर्तौलाले वर्तमान सरकारलाई नेकपा एमालेले दिएको समर्थन फिर्ता लिएको सन्देश लिएर मन्त्रीहरूले राजीनामा बुझाउने क्रममा प्रधानमन्त्रीले भण्डारीको गीत सुनाउनुभएको स्मरण गराउँदै जवाफमा गायिका अञ्जु पन्तको गीत सुनाउनुभयो–
“तिमीले पराइ ठानेपछि, पराइ हुन के भयो र
तिम्रो मेराबिचको नाता हुनुपर्ने के रह्यो र”
त्यस्तै, आइतबारको बैठकमा सांसद सुनिल शर्माले गायक रामकृष्ण ढकालको गीत “छल गर्यो मायाले… सबैको देख्छु हासो र खुसी शिखरको बाटोमा आफू त…” गाउनुभएको थियो । बैठकमा सांसदले दलीय प्रतिनिधित्व गर्दै एकार्कालाई साङ्गीतिक झटारो प्रहार गरिरहेका छन् ।
विशेष समयमा नेपाल कम्युनिस्ट पार्टी (माओवादी केन्द्र) का सांसद पूर्णबहादुर घर्तीले गायिका कुन्ति मोक्तानको “कति जल्छौँ आरिसले अझै जल्दै गर, म त हिँड्छु मेरै बाटो खुट्टा तान्दै गर” सुनाउनुभयो । उहाँले बैठकमा गीतको बिम्ब प्रस्तुत गरिएकाले आफूलाई पनि गीतको हरफ आएको भन्दै राजनीतिमा सरकार फेरबदल भइरहनु सामान्य कुरा भएको बताउनुभयो ।
