काठमाडौं । सरकारले २२ जना सचिवको सरुवा गरेको छ ।
बुधवार मन्त्रिपरिषद् बैठकका निर्णय सार्वजनिक गर्दै सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले सो जानकारी दिएका हुन्।
मन्त्री गुरुङका अनुसार रामकृष्ण सुवेदी सार्वजनिक खरिद अनुगम कार्यालयमा सरुवा गरिएको छ भने अर्जुनप्रसाद पोखरेललाई भूमि व्यवस्था, सहकारी तथा गरिबी निवारण मन्त्रालयमा पठाइएको छ।
यस्तै, मधुकुमार मरासिनी उपराष्ट्रपतिको कार्यालय, गोकर्णमणि सुवेदी राष्ट्रिय तथ्यांक कार्यालयको प्रमुख तथ्यांक अधिकारी, सुरेश आचार्य जल तथा उर्जा आयोगको सचिवालय, भरतमणि सुवेदी संघीय मामिला तथा सामान्य प्रशासन मन्त्रालय, प्रमिलादेवी बज्राचार्य खानेपानी मन्त्रालयमा सरुवा भएका छन्।
यसैगरी मधुसुदन बुर्लाकोटी उद्योग वाणिज्य तथा आपूर्ति मन्त्रालयमा सचिव, डा. रामप्रसाद घिमिरे अर्थ मन्त्रालय सचिव, किरणराज शर्मा राष्ट्रिय प्राकृतिक श्रोत तथा वित्त आयोग, डिल्लीराम शर्मा लोकसेवा आयोगमा सचिव, रामकुमार श्रेष्ठ प्रधानमन्त्री तथा मन्त्रीपरिषद्को कार्यालय, गोपालप्रसाद सिग्देल उर्जा, जलश्रोत तथा सिंचाई मन्त्रालय, रामेश्वर दंगाल रक्षा मन्त्रालयको जिम्मेवारी दिइएको छ।
यस्तै, मुकुन्दप्रसाद निरौला श्रम, रोजगार तथा सामाजिक सुरक्षा मन्त्रालय, सर्जुकुमार वैद्य प्रमुख अधिकृत राष्ट्रिय शतर्कता केन्द्र, नारायणप्रसाद शर्मा हुमागाईं राष्ट्रपतिको कार्यालय, केशवकुमार शर्मा बिडारी भौतिक पूर्वाधार तथा यातायात मन्त्रालय, रामआधार साह नेपाल ट्रस्टको कार्यालय, सचिव बनेका छन्।
मन्त्री गुरुङका अनुसार घनश्याम उपाध्याय अख्तियार दुरुपयोग अनुसन्धान आयोग, दिनेशकुमार घिमिरे अर्थ मन्त्रालयको राजश्व सचिव, राधिका अर्याल सञ्चार तथा सूचना प्रविधि मन्त्रालयमा सचिवमा सरुवा भएका छन्।
यस्तै, सरकारले चिकित्सा शिक्षा आयोग र शिक्षा, विज्ञान तथा प्रविधि मन्त्रालय अन्तर्गत आर्थिक वर्ष २०८१÷०८२ का लागि राजपत्राङ्कित श्रेणी वा सो सरहका जम्मा ५९ अस्थायी दरबन्दी स्वीकृत गर्ने निर्णय पनि गरेको छ।
मन्त्री गुरुङका अनुसार सरकारले १८ जना राजदूत नियुक्त गरेको छ।
शंकरप्रसाद शर्मा भारत, श्रीकान्त रिजाल अस्टे«लिया, नरेशविक्रम ढकाल साउदी अरेबिया, प्राध्यापक डाक्टर कपिलमान श्रेष्ठ दक्षिण अफ्रिका, प्राध्यापक धनप्रसाद पण्डित इजरायल, रामकृष्ण भट्टराई श्रीलंका, सनिल नेपाल स्पेन, सहिल रुपाखेती जर्मनी, लोकदर्शन रेग्मी संयुक्त राज्य अमेरिका, चन्द्रकुमार घिमिरे संयुक्त अधिराज्य, डा शिवमाया तुम्बाहाम्फे दक्षिण कोरिया, जंगबहादुर चौहान रुसी महासंघ, रमेशचन्द्र पौडेल कतार, प्राडा कृष्णप्रसाद ओली चीन, सुम्निमा तुलाधर डेनमार्क, डा. नेत्रप्रसाद तिमल्सिना मलेसिया, प्रकाशमणि पोखरेल पोर्चुगल, रिता धिताल पाकिस्तानका लागि राजदूत सिफारिस भएका हुन्।
नेपाली सेनामा हाल ज्येष्ठता क्रममा रहेका बलाधिकृत रथि अशोकराज सिग्देललाई सैनिक ऐन, २०६३ को दफा ८ को उपदफा ३ बमोजिम मिति २०८१ साउन २५ गतेदेखि लागू हुनेगरी कायममुकायम भइ प्रधानसेनापतिको कार्यभार सम्हाल्ने गरी तोक्न राष्ट्रपतिसमक्ष सिफारिस गर्ने निर्णय पनि मन्त्रिपरिषद बैठकले गरेको छ।
सो सिफारिस बमोजिम रथि सिग्देललाई राष्ट्रपतिको कार्यालयले कामु प्रधान सेनापतिको जिम्मेवारी दिइसकेको छ।
यसैगरी बागमती प्रदेश, लुम्बिनी प्रदेश र कर्णाली प्रदेश प्रमुखलाई पदमुक्त गरी दीपकप्रसाद देबकोटा बागमती प्रदेश, कृष्णबहादुर घर्तीमगर लुम्बिनी प्रदेश र यज्ञराज जोशी कर्णाली प्रदेशमा नियुक्त गर्न सम्माननीय राष्ट्रपति समक्ष सिफारिस गर्ने निर्णय भएको मन्त्री गुरुङले जानकारी दिए।
मन्त्रिपरिषदको सिफारिस अनुसार नयाँ प्रदेश प्रमुखको नियुक्तिसमेत भइसकेको छ।
