काठमाडौं । प्रधानमन्त्री केपी शर्मा ओली र पूर्वप्रधानमन्त्री एवम् नेपाली कांग्रेसका सभापति शेरबहादुर देउवाविरुद्ध ‘मुर्दावाद’को नारा लागेको छ ।
सोमबार सुदूरपश्चिममा मनाइने गौरा पर्वको अवसरमा काठमाडौँको टुँडिखेलमा आयोजित कार्यक्रममा सहभागी हुन पुगेका प्रधानमन्त्री ओली र कांग्रेस सभापति देउवाविरुद्ध नाराबाजी भएको हो ।
कार्यक्रमको उद्घाटन ओली र देउवा दुवैले मिलेर गरे भने दुवैले टुँडिखेलस्थित मञ्चमा राखिएको दमाह पनि सँगै बजाएका थिए।
कार्यक्रममा सहभागी भिडबाट नेताहरूको विरोध गर्दै केही युवाहरूले नारा लगाएका हुन् ।
नारा चलिरहेकैबीचमा पोडियममा सम्बोधन गर्न पुगेका देउवालाई देखेर भिड थप उत्तेजित बन्यो। उत्तेजित भिडले नेताहरूको विरोधमा ‘मुर्दावाद’ को नारा लगाउन थालेको थियो।
त्यसपछि देउवा पनि आक्रोशित हुन थाले। ‘तपाईंहरूले जति गरे पनि बोल्नेवाला छु म। जति गरेपनि गर्नुस्। जति कराए पनि कराउनुस्। जति कराउनुपर्ने छ कराउउनुस्,’ देउवाले भने।
भिड झनै आक्रमक बन्न थाल्यो। त्यसपछि कार्यक्रम बिथोल्न आएकाहरू भन्दै देउवा रिसाए।
‘लाज पनि छैन, अर्काको कार्यक्रम बिथोल्नेरु लाज नभएकाहरू! अर्काको कार्यक्रम बिथोल्नेरु लाज छैनरु यही हो तपाईंहरूको संस्कृति! यही हो तपाईंहरूको चलनरु यही कुरा सिकेर आएको हो! बदमासहरू!,’ देउवाले भने।
यति भनेपछि देउवा सम्बोधनतिर लागे।
‘आदरणीय दाजुभाई, दिदीबहिनीहरू, यस्तै छ। यहाँ गौरा पर्व सुन्न आएकाहरू छन्। गौरा खेल्न आएका छन्। गौरा पर्वको कुरा सुनुन्,’ देउवाले अघि भने, ‘यीनीहरू सुन्दैनन्, न गौरा खेल्न दिन्छन्। यस्तो अर्काको कार्यक्रम बिथोलेर बसेका छन्। यहाँ को को त्यस्ता छन्, तीनलाई ठिक पार्नुपर्छ।’
नेपाली समाज कसैले भाँड्न खोजेर भाँडिदैन : प्रधानमन्त्री ओली
कार्यक्रमलाई सम्बोधन गर्दै प्रधानमन्त्री केपी शर्मा ओलीले नयाँ पुस्ताले सभ्यता, शिष्टता र मर्यादा बिर्सिएको बताए । उनले नयाँ पुस्ताले आफ्नो परम्परा र संस्कृतिअनुसार सभ्यता र शिष्टता बिर्सिएको देख्दा अचम्मित भएको बताए। उनले नयाँ पुस्ताको अकर्मण्यता नेपालीपन नभएको बताए।
उनले भने, ‘नयाँ पुस्तामा हाम्रो सभ्यता, शिष्टता कस्तो हो, मर्यादा कस्तो हो भन्ने बिर्सिन खोजेको देख्दा अचम्म लाग्छ। यस्ता घटनाहरु विभिन्न स्थानमा देखिने गरेका छन्। अरुका कार्यक्रम बिथोल्ने गरेका छन्। म आग्रह गर्न चाहन्छु, यो नेपालीपन होइन, नेपाली संस्कृति होइन।’
