१८ वैशाख,काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले अन्तर्राष्ट्रिय श्रमिक दिवस (१ मई) २०२५ का अवसरमा स्वदेश तथा विदेशमा रहेका सम्पूर्ण श्रमजीवी दिदीबहिनी, दाजुभाइ तथा आमा बुवाहरूलाई सुख, शान्ति र समृद्धिसहित उत्तरोत्तर प्रगतिको शुभकामना व्यक्त गरेका छन्।
शुभकामना सन्देशमा अध्यक्ष प्रचण्डले ८ घण्टे कार्य दिनको मागसहित अमेरिकाको शिकागो शहरमा मजदूरहरूले गरेका संघर्षलाई स्मरण गर्दै नेपालसहित विश्वभरका मजदूरहरूले १ मईलाई अन्तर्राष्ट्रिय श्रमिक दिवसको रुपमा मनाउँदै आएको उल्लेख गरेका छन्। यस ऐतिहासिक दिनमा उनले नेपालसहित सम्पूर्ण श्रमजीवी वर्गसँग जुझारु ऐक्यवद्धता प्रकट गरेका छन्।
उनले सन्देशमा उल्लेख गरेका छन् कि नेपालमा श्रमजीवी जनसमुदायले आफ्नो अधिकारका निम्ति संघर्ष र बलिदानका थुप्रै कीर्तिमानहरू स्थापना गरेका छन्। किसान, मजदूर, उत्पीडित जाति, क्षेत्र, लिङ्ग र समुदायका जनताको संघर्षकै कारण संघीय लोकतान्त्रिक गणतन्त्रात्मक व्यवस्था कायम भएको भन्दै सुशासन, सामाजिक न्याय र समृद्धिको आकांक्षासहित मुलुकलाई अघि बढाउनु आजको ऐतिहासिक कार्यभार भएको बताए।
अध्यक्ष प्रचण्डले हाल मुलुकमा भ्रष्टाचार, बेथिति, अनियमितता, बिचौलिया र दलाल पुँजीवादसँग संघर्ष गर्नुपर्ने अवस्था रहेको उल्लेख गर्दै यस्तो परिवेशमा श्रमजीवी वर्गले नेतृत्वदायी भूमिका निर्वाह गर्दै सबै खाले बेथितिका विरुद्ध निरन्तर संघर्ष गर्नु पर्नेमा जोड दिएका छन्। साथै, प्रतिगामी तत्व र यथास्थितिवादविरुद्ध श्रमिक वर्गले मौलिक पहिचानसहित अघि बढ्नु आवश्यक रहेको उनले बताएका छन्।
उनले सुशासन, सामाजिक न्याय र आर्थिक समृद्धिसहितको नेपाली विशिष्टतासहितको समाजवादी कार्यदिशामा अघि बढ्नु आजको आवश्यकता भएको उल्लेख गर्दै बदलिएको राजनीतिक व्यवस्थाको प्रकाशमा श्रमजीवी वर्गको अवस्था बदल्न पूर्णरूपमा समर्पित हुन सबैलाई आह्वान गरेका छन्।
“आम श्रमजीवी वर्गलाई सशक्त बनाउने प्रण गरौं, यही नै साँचो अर्थमा अन्तर्राष्ट्रिय श्रमिक दिवसको सन्देश हुनेछ,” अध्यक्ष प्रचण्डको सन्देशमा उल्लेख छ।
सन्देशको अन्त्यमा अध्यक्ष प्रचण्डले पुनः अन्तर्राष्ट्रिय श्रमिक दिवस (१ मई) २०२५ को अवसरमा शुभकामना व्यक्त गरेका छन्।
प्रचण्डकाे शुभकामना सन्देश ।
