२१ असार, काठमाडौं । श्री नेवा सम्पर्क समूह रामेछाप अन्तर्गत सञ्चालित सोलुथुम्का कला समूहद्वारा आयोजना गरिएको सोलुथुम्का नृत्य प्रतियोगिता भव्य रूपमा सम्पन्न भएको छ। रामेछापका युवा दाजुभाइ तथा दिदीबहिनीहरूको उल्लेखनीय सहभागितासहित सम्पन्न प्रतियोगितामा कुल १८ जना प्रतियोगीले सहभागिता जनाएका थिए।
कार्यक्रममा नेवा सम्पर्क समूह रामेछापका संस्थापक अध्यक्ष नन्दबहादुर श्रेष्ठ, वर्तमान अध्यक्ष रामकुमार श्रेष्ठ, पूर्व अध्यक्षहरू ताराराम श्रेष्ठ, हरिबहादुर श्रेष्ठ, केशर बहादुर श्रेष्ठ, टिकाराम श्रेष्ठ, सोलुथुम्का कला समूहकी अध्तयक्ष श्रृष्टि श्रेष्ठ तथा भक्तपुरका अतिथि रामहरि श्रेष्ठजस्ता विशिष्ट व्यक्तित्वहरूको उपस्थिति रहेको थियो।
मनोरञ्जन विभाग प्रमुख हिमाल श्रेष्ठले सो अवसरमा भन्नुभयो, “हामीभित्र लुकेका प्रतिभा उजागर गर्दै, हाम्रो मौलिक कला र संस्कृतिको संरक्षण तथा प्रवर्द्धन गर्नु हाम्रो मुख्य उद्देश्य हो।”
सोलुथुम्का कला समूहकी सल्लाहकार सम्झना श्रेष्ठले समूहले विगतदेखि नै युवा पुस्तालाई समेटेर विभिन्न सांस्कृतिक कार्यक्रमहरू सञ्चालन गर्दै आएको जानकारी दिइन्। उनले भनिन्, “यस नृत्य प्रतियोगिता मार्फत युवाहरूमा रहेको अन्तरनिहित प्रतिभा बाहिर ल्याउनुका साथै नेवारी संस्कृति र परम्परालाई संरक्षण गर्न योगदान पुग्नेछ।”
कार्यक्रमले स्थानीय स्तरमा संस्कृति जगेर्ना र समुदायमा सांस्कृतिक चेतना अभिवृद्धि गर्न उल्लेखनीय योगदान पुर्याएको सहभागी तथा दर्शकहरूले बताएका छन्।
