काठमाडौं, श्रावण ३० – मनमोहन मेमोरियल मेडिकल कलेज तथा शिक्षण अस्पताल, स्वयम्भूमा श्रावण २७ देखि ३० गतेसम्म आयोजित बृहत स्वास्थ्य परीक्षण कार्यक्रम–२०८२ अन्तर्गत २८१ जना फास्ट फुड व्यवसायीले सम्पूर्ण स्वास्थ्य परीक्षण (Whole Body Check-up) गराएका छन्।
कार्यक्रमको अध्यक्षता फास्ट फुड एसोसिएसन नेपालका अध्यक्ष होमराज श्रेष्ठले गर्नुभएको थियो भने संयोजन स्वास्थ्य विभाग प्रमुख कुमार भण्डारीले गर्नुभयो। कार्यक्रममा संस्थाका कार्यसमिति सदस्य, पूर्व तथा निवर्तमान अध्यक्ष, सल्लाहकार, काठमाडौं, ललितपुर र भक्तपुर जिल्लाका व्यवसायी तथा श्रमिकहरूको उल्लेखनीय सहभागिता रहेको थियो।
महासचिव राकेश श्रेष्ठले स्वास्थ्य परीक्षणमार्फत व्यवसायीहरू लाभान्वित भएको जानकारी दिंदै अस्पताल परिवारप्रति धन्यवाद व्यक्त गर्नुभयो।
यसै अवसरमा फास्ट फुड एसोसिएसन नेपाल र मनमोहन मेमोरियल मेडिकल कलेज तथा शिक्षण अस्पताल बीच स्वास्थ्य सेवामा विशेष सुविधा उपलब्ध गराउने सम्झौता सम्पन्न भएको छ। सम्झौताअनुसार फास्ट फुड व्यवसायी, शेयर सदस्य, व्यवसायीका परिवार, कार्यरत श्रमिक तथा सिफारिस प्राप्त व्यक्तिहरूलाई नियमित स्वास्थ्य परीक्षण, ल्याब, एक्स–रे, भिडियो एक्स–रे, ईसीजी, ईको, आईसीयू, भेन्टिलेटर, अपरेसनसहित अस्पतालमा उपलब्ध सम्पूर्ण सेवामा विशेष छुट प्रदान गरिनेछ।
सम्झौतामा फास्ट फुड एसोसिएसन नेपालतर्फबाट अध्यक्ष होमराज श्रेष्ठ, उपाध्यक्ष रामकाजी भण्डारी, महासचिव राकेश श्रेष्ठ, सचिव तथा स्वास्थ्य विभाग प्रमुख कुमार भण्डारी र अस्पतालतर्फबाट कार्यकारी निर्देशक डा. एन. शर्मा, डा. मुझ श्रेष्ठ र मेडिकल डाइरेक्टर डा. निराजन सुवेदीले हस्ताक्षर गर्नुभएको छ।
