स्तम्भन्युज
-खेम राज अधिकारी 
काठमाडौं, भदौ २६ । राजधानी स्थित केन्द्रीय कारागार सुन्धारा र नक्खु कारागारबाट भागेका कैदी बन्दीलाई प्रहरीले तीव्र गतिमा खोजी कार्य थालेको छ।
जेनजीको नेतृत्वमा भएको देशव्यापी प्रदर्शनका क्रममा तोडफोड र आगजनी फैलिँदा मंगलबार बेलुकी कैदीहरूले कारागारबाट भाग्ने अवसर पाएका थिए। प्रहरीका अनुसार, प्रदर्शनकारीहरूले कारागारको गेटमै आएर ताल्चा भंग गरी ढोका खोलिदिए पछि कैदीहरू बाहिरिएका थिए।
सुन्धारा कारागारबाट टोपबहादुर रायमाझी, बेचन झालगायत करिब ३ हजार कैदी फरार भएको प्रारम्भिक विवरणमा उल्लेख छ। त्यस्तै, नक्खु कारागारबाट समेत रवि लामिछाने सहितका कैदीहरू निस्किएका छन्।
प्रहरीले काठमाडौं उपत्यकासहित देशका विभिन्न भागमा खोजतलास तीव्र बनाएको जनाएको छ। साथै, अन्य केही जिल्लाका कारागारहरूबाट पनि कैदी भागेको रिपोर्ट आएको र त्यसबारे अनुसन्धान भइरहेको छ।
गृह मन्त्रालयले भागेका कैदीलाई चाँडै नियन्त्रणमा लिन सम्पूर्ण सुरक्षा निकायलाई निर्देशन दिएको छ।
