- स्तम्भन्युज
— खेम राज अधिकारी
स्तम्भन्युज खबर
१७ फागुन, काठमाडौँ । सरकारले आज राति १२ बजेदेखि नेपाल–भारत र नेपाल–चीनतर्फका सबै अन्तर्राष्ट्रिय सीमा नाकाहरू अस्थायी रूपमा बन्द गर्ने निर्णय गरेको छ । आगामी प्रतिनिधि सभा तथा प्रदेश सभा निर्वाचनलाई लक्षित गर्दै सुरक्षा व्यवस्थालाई थप कडाइ गर्न सीमा नाका बन्द गरिने जनाइएको छ ।
गृह मन्त्रालय ले जारी गरेको सूचना अनुसार मतदान प्रक्रिया निष्पक्ष, भयरहित र व्यवस्थित बनाउन सीमा नाकामा आवतजावत पूर्ण रूपमा रोक लगाइनेछ । अत्यावश्यक सेवा, एम्बुलेन्स तथा विशेष अनुमति प्राप्त सवारी साधनबाहेक अन्यलाई आवतजावतमा रोक लगाइने बताइएको छ ।
आयोगले सीमा नाका बन्दसम्बन्धी व्यवस्था प्रभावकारी रूपमा कार्यान्वयन गर्न सम्बन्धित निकायलाई आग्रह समेत गरेको छ ।
निर्वाचनलाई स्वच्छ, निष्पक्ष र स्वतन्त्र बनाउने उद्देश्यले निर्वाचन आयोगले तयार गरेको निर्वाचन सुरक्षा निर्देशिका बमोजिम आज राती १२ बजेदेखि अन्तर्राष्ट्रिय सीमाना जोडिएका जिल्लाहरुमा अन्तर्राष्ट्रिय सीमा नाका बन्द गर्नको लागि निर्वाचन आयोगले नेपाल सरकारलाई सिफारिस गरे बमोजिम सीमा नाकाहरु बन्द रहनेछन् । सोही बमोजिमको व्यवस्था गर्न/गराउनको लागि सम्बन्धित निकायलाई निर्वाचन आयोगले अनुरोध गरेको छ ।
सुरक्षा निकायले सीमा क्षेत्रमा निगरानी बढाएको छ भने सम्बन्धित जिल्ला प्रशासन कार्यालयहरूलाई आवश्यक समन्वयका लागि निर्देशन दिइएको छ । सीमा नाका बन्दका कारण यात्रुहरूलाई असुविधा हुन सक्ने भन्दै आवश्यक तयारीका साथ मात्र यात्रा गर्न आग्रह गरिएको छ ।
निर्वाचन सम्पन्न भएसँगै परिस्थितिको समीक्षा गरी सीमा नाका पुनः सञ्चालन गरिने मन्त्रालयले जनाएको छ ।
