३० कार्तिक, रामेछाप । JCI खाँडादेवीद्वारा आयोजना गरिएको जेसीज सप्ताह–२०८२ अन्तर्गत सातौँ दिनको “जेसीज सप्ताह समापन तथा नृत्य प्रतियोगिता–२०८२” कार्यक्रम जिरे खुर्सानी दरबारमा भव्यरूपमा सम्पन्न भएको छ।
खाँडादेवी जेसीज वर्ष २०२५ की अध्यक्ष जेसी सरिता श्रेष्ठको अध्यक्षतामा सम्पन्न कार्यक्रमलाई नेपाल जेसीज वर्ष २०२५ की राष्ट्रिय उपाध्यक्ष बबिता पाण्डे, वागेश्वरी सहकारीका अध्यक्ष खड्ग बहादुर श्रेष्ठ, संस्थापक अध्यक्ष रुद्रबहादुर श्रेष्ठ, विभिन्न शाखाका अध्यक्ष तथा पूर्वअध्यक्षज्यूहरू, स्थानीय जनप्रतिनिधि, सामाजिक तथा सांस्कृतिक व्यक्तित्वलगायतको उल्लेखनीय उपस्थितिले विशेषता दिएको थियो।
आयोजकका अनुसार करिब २५० जनाको सहभागिता रहेको यस कार्यक्रम युवा प्रतिभा विकास, स्थानीय भेषभूषा, संस्कार, भाषा तथा सांस्कृतिक पहिचान संरक्षणको उद्देश्यले आयोजना गरिएको हो।
नृत्य प्रतियोगितामा जम्मा १९ जना प्रतिस्पर्धी सहभागी बनेका थिए। विजेताहरूमा प्रथम : रोशनी श्रेष्ठ, द्वितीय : रन्जिता श्रेष्ठ, तृतीय : दीपा श्रेष्ठ, सान्त्वना : आरती महर्जन / आरती नेपाल
विजेताहरूलाई क्रमशः रु ७,०००, रु ५,०००, रु ३,००० र रु २,००० सहित एवार्ड, मेडल र प्रमाणपत्र प्रदान गरिएको थियो।
कार्यक्रमका अन्त्यमा आयोजक संस्थाले सबै विजेताहरूलाई बधाई ज्ञापन गर्दै सहभागी, सहयोगी तथा उपस्थित सबैप्रति हार्दिक धन्यवाद व्यक्त गरेको थियो।
