- स्तम्भन्युज
— खेम राज अधिकारी
स्तम्भन्युज खबर
१७ फागुन, काठमाडौँ । नेपाल सरकारले मध्यपूर्व तथा खाडी क्षेत्रमा उत्पन्न विषम परिस्थितिलाई मध्यनजर गर्दै ती देशहरूमा नेपाली कामदार पठाउने प्रक्रिया अस्थायी रूपमा स्थगित गरेको छ।
विभिन्न देशहरूमा जाने नेपाली कामदारहरूको श्रम स्वीकृति तत्कालका लागि स्थगित गर्ने निर्णय गरेको छ । श्रम, रोजगार तथा सामाजिक सुरक्षा मन्त्रालयले एक सूचना जारी गर्दै मन्त्रीस्तरीय निर्णय अनुसार यस्तो व्यवस्था गरिएको हो ।
मन्त्रालयले साउदी अरेबिया, संयुक्त अरब इमिरेट्स, कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायलमा श्रम स्वीकृति तत्कालका लागि स्थगित गरेको हो ।
नेपाल सरकार ले पछिल्लो समय मध्यपूर्व क्षेत्रमा बढ्दो द्वन्द्व, सुरक्षा चुनौती र अनिश्चित अवस्थालाई ध्यानमा राख्दै यस्तो निर्णय गरेको श्रम, रोजगार तथा सामाजिक सुरक्षा मन्त्रालयले जनाएको छ। मन्त्रालयका अनुसार नेपाली नागरिकको सुरक्षालाई प्राथमिकता दिँदै अर्को सूचना जारी नभएसम्म श्रम स्वीकृति प्रदान गर्ने कार्य रोकिएको छ।
सरकारले सम्बन्धित देशस्थित नेपाली दूतावासहरूसँग समन्वय गरी त्यहाँ कार्यरत नेपालीहरूको अवस्थाबारे नियमित जानकारी लिइरहेको जनाएको छ। आपतकालीन अवस्था उत्पन्न भए उद्धार तथा सहायताका लागि तयारी अवस्थामा रहेको पनि बताइएको छ।
वैदेशिक रोजगारीमा जान तयारीमा रहेका कामदारहरूलाई हाललाई नयाँ श्रम स्वीकृतिका लागि आवेदन नदिन र आधिकारिक सूचनाको प्रतीक्षा गर्न आग्रह गरिएको छ। साथै, म्यानपावर कम्पनीहरूलाई पनि भर्ना प्रक्रिया स्थगित गर्न निर्देशन दिइएको छ।
सरकारले परिस्थिति सामान्य भएपछि पुनः प्रक्रिया सुचारु गरिने स्पष्ट पारेको छ।
