— खेम राज अधिकारी
स्तम्भन्युज खबर
२६ फागुन,काठमाडौँ । वायु प्रदूषणको मात्रा बढ्दै गएपछि स्वास्थ्य तथा जनसंख्या मन्त्रालयले सर्वसाधारणलाई अत्यावश्यक काम बाहेक घरबाहिर ननिस्कन आग्रह गरेको छ।
मन्त्रालयले मंगलबार एक सूचना जारी गर्दै वायुमण्डलमा प्रदूषणको स्तर बढ्दा मानव स्वास्थ्यमा गम्भीर असर पर्न सक्ने भएकाले सावधानी अपनाउन अनुरोध गरेको हो।
सूचनामा विशेषगरी बालबालिका, ज्येष्ठ नागरिक, गर्भवती महिला तथा श्वासप्रश्वास, मुटु र एलर्जीसम्बन्धी समस्या भएका व्यक्तिहरूलाई बढी सतर्क रहन भनिएको छ। बाहिर निस्कनै परेमा मास्क प्रयोग गर्न र अनावश्यक रूपमा लामो समयसम्म बाहिर नबस्न मन्त्रालयले सुझाव दिएको छ।
त्यस्तै, घरभित्रै बस्दा झ्याल–ढोका बन्द गरेर बस्ने, धुलो तथा धुवाँबाट टाढा रहने र स्वास्थ्यमा समस्या देखिए नजिकको स्वास्थ्य संस्थामा सम्पर्क गर्न पनि मन्त्रालयले आग्रह गरेको छ।
हाल केही दिनयता काठमाडौं उपत्यकासहित देशका विभिन्न स्थानमा वायुप्रदूषणको स्तर बढ्दै गएको छ। विशेषज्ञहरूले प्रदूषण बढ्दा श्वासप्रश्वाससम्बन्धी रोग, आँखामा जलन, घाँटी दुख्ने तथा अन्य स्वास्थ्य समस्या बढ्न सक्ने बताएका छन्।
