काठमाडौं, भाद्र १ । सरकारले निजी मेडिकल शिक्षा संस्थाको पक्षमा निर्णय गरेको भन्दै अखिल (छैठौं) ले काठमाडौंमा विरोध प्रदर्शन गरेको छ। केन्द्रीय समितिको आयोजनामा शनिबार शान्तिवाटिकामा गरिएको कार्यक्रममा सहभागीहरूले सरकारको मेडिकल माफिया प्रवृत्तिविरुद्ध आवाज उठाए।
प्रधानमन्त्री केपी शर्मा ओली नेतृत्वको राष्ट्रिय चिकित्सा आयोगले हालै १,३५९ वटा एमबिबिएस सिट निजी क्षेत्रका लागि मात्रै छुट्याएको थियो। सो निर्णयलाई राष्ट्रघाती भन्दै अखिल (छैठौं) ले सांकेतिक प्रदर्शन गरेको हो।
कार्यक्रमलाई सम्बोधन गर्दै अध्यक्ष सुवास जिसीले गरिबका छोराछोरीले अब उच्चतम अंक ल्याए पनि डाक्टर बन्ने सपना पुरा गर्न नसक्ने बताए। उनले भने, “प्रधानमन्त्री ओलीले सम्पूर्ण कोटा निजी क्षेत्रलाई दिएर नेपाली जनतामाथि गद्दारी गरेका छन्।”
संविधानमै शिक्षा र स्वास्थ्यलाई निःशुल्क अधिकारको रूपमा व्यवस्था गरिएको स्मरण गराउँदै जिसीले सरकारले संविधान विपरीत कदम चालेको दाबी गरे। उनले प्रधानमन्त्री र शिक्षा तथा वातावरणमन्त्रीलाई संविधान र जनतामाथि घात गरेको आरोपसमेत लगाए।
उनका अनुसार सरकारको यो निर्णय मेडिकल माफियाको पक्षमा गरिएको छ, जसविरुद्ध अब जनताले उठ्नुपर्ने आवश्यकता छ। “देशव्यापी आन्दोलन अपरिहार्य बन्दै गएको छ, अहिले हामीले केवल सांकेतिक विरोध गरेका छौं,” जिसीले स्पष्ट पारे।
कार्यक्रमको सञ्चालन महासचिव पुरन पोख्रेलले गरेका थिए।
