काठमाडौँ । राष्ट्रिय जनमोर्चाले प्रधानमन्त्री केपी शर्मा ओलीलाई विश्वासको मत नदिने स्पष्ट पारेको छ ।
२०८१ साउन ६ गते आइतबार प्रतिनिधि सभामा ओलीले प्रस्तुत गरेको विश्वासको मतसम्बन्धी प्रस्तावमाथि छलफलमा भाग लिँदै अध्यक्ष चित्रबहादुर केसीले मत नदिने जानकारी दिनुभएको हो ।
उहाँले प्रधानमन्त्री ओलीलाई बधाई दिँदै राम्रो काम गरे समर्थन र नराम्रो गरे विरोध गर्ने पनि स्पष्ट पार्नुभयो ।
‘राष्ट्रिय जनमोर्चाले बधाई दिन्छ, समर्थन दिन्नँ’ केसीले भन्नुभयो– ‘राम्रो गर्नुस्, राम्रो गर्दा समर्थन, नराम्रो गर्दा विरोधमा जनमोर्चा जान्छ । यो सरकारलाई समर्थन गर्न सक्दैन ।’
साथै, उहाँले शीर्ष दलहरू नै सरकार बनाउने र भत्काउने खेलमा मात्रै लागेको आरोप पनि लगाउनुभयो ।
अध्यक्ष केसीले मुलुकमा सुशासन प्रवर्द्धन र आर्थिक समृद्धिको यात्रालाई अगाडि बढाउन वर्तमान सरकार गम्भीर भएर लाग्नुपर्नेमा जोड दिनुभयो ।
उहाँले जनताका समस्यालाई सम्बोधन गर्न सबै राजनीतिक दलहरू जिम्मेवार बन्नुपर्ने धारणा राख्नुभयो ।
