वीरगंज, असोज १९ – असोज १७ गतेदेखि परेको अविरल वर्षाका कारण पर्सा जिल्लाका विभिन्न स्थानहरू डुवानमा परेका छन् । वीरगंज महानगरपालिका वडा नम्बर ११,१६ धाेविनी नगरपालिका वडा नम्बर ५ जगन्नाथपुर गापालिका वडा नम्बर ३ बहुदरमाई नगरपालिका वडा नम्बर ५ लगायतका बस्तीहरू प्रभावित बनेका छन् ।
प्रहरीको विवरण अनुसार डोमबस्ती, चमारटोल, शिवपार्वती, बलिरापुर, नगवा, छप्कैया टोललगायत स्थानमा घरधुरी डुवानमा परेका छन् ।
प्रारम्भिक विवरणमा वीरगंज महानगरपालिका मात्र ५३ जना प्रभावित भएको उल्लेख छ ।
उद्धारका लागि विभिन्न प्रहरी युनिट खटिएका छन् । जिल्ला प्रहरी कार्यालय पर्सावाट प्रहरी नायव उपरीक्षक सहितकाे टाेली,वडा प्रहरी कार्यालय विर्ताकाे टाेली, ईलाका प्रहरी कार्यालय श्रीपुर लगायतका प्रहरी उद्धारमा खटिएका थिए ।
प्रहरीले स्थानीयलाई उद्धार गर्न लाइफ ज्याकेट, डोरी, टयुभ, कोदालो, साबेल लगायतका साधन प्रयोग गरेको जनाएको छ । उद्धार गरिएका परिवारलाई छिमेकीको घर, विद्यालय, धर्मशाला र खुला चौरमा अस्थायी रूपमा पुनःस्थापना गरिएको छ ।
बाढीले चौपाय पनि प्रभावित बनाएको छ । वीरगंज–२४ बाट मात्रै ५० वटा गाईलाई उद्धार गरी सुरक्षित स्थानमा राखिएको प्रहरीको रिपोर्टमा उल्लेख छ ।
अविरल वर्षाका कारण बसपार्क प्रहरी चौकीमा पानी पसेको भए पनि अन्य कार्यालयमा ठूलो क्षति नभएको प्रहरीको प्रारम्भिक विवरणमा जनाइएको छ ।
डुवानका कारण वीरगंज–नारायणगढ सडकखण्डमा यातायात आंशिक रूपमा रोकिएको छ । विद्युत्, टेलिफोन पोल ढलेका कारण पूर्वी क्षेत्रमा सेवा अवरुद्ध भएको पनि प्रहरीले जनाएको छ ।
नेपाल प्रहरीले विभिन्न वडामा माईकिङ गरी स्थानीयलाई सचेत गराएको छ । अनावश्यक यात्रा नगर्न र जोखिम क्षेत्रमा नजान आग्रह गरिएको छ ।
तस्बिरहरू
