काठमाडौं । नेकपा एमालेका नेता डा. भीम रावलले नयाँ भनिएका दलले प्रश्न सोधेकै कारण राष्ट्रिय स्वतन्त्र पार्टीले महामन्त्री मुकुल ढकाललाई कारबाही गरेको बताएका छन् ।
शनिबार राष्ट्रिय जनमोर्चाले काठमाडौंमा आयोजना गरेको ‘सहकारी रकम अपलचन र त्यसमा राज्यले गरेको संरक्षणबाट उत्पन्न परिस्थिति’ विषयक अन्तरक्रिया कार्यक्रमलाई सम्बोधन गर्दै नेता रावलले रास्वपाप्रति यस्तो कटाक्ष गरेका हुन् ।
प्रश्न गरेकै भरमा महामन्त्री ढकाललाई पार्टीबाट निस्कासित गरिएको उनको भनाइ थियो । उनले आजभोलि राजनीतिक दलहरुमा प्रश्न सोध्न पनि नपाइने गरेको बताए ।
‘हुन त आजकाल सोध्न पनि पाइँदैन। भर्खर एउटा नयाँ पार्टी आएको उनकै महामन्त्रीले केके सोध्यो भनेर पार्टीबाटै निकालिदिएछ। भन्नेबेला भयंकर लोकतन्त्र हामी। ए यस्तो लोकतन्त्र ?,’ उनले भने।
उनले आफूलाई लोकतन्त्रवादी भन्ने रवि लामिछाने व्यवहारमा भयंकर निरंकुशतावादी रहेको बताए । दुईवटा नागरिकता, दुईवटा पासपोर्ट बोकेर ठगी गर्नेले देशको गृहमन्त्रालयको जिम्मेवारी सम्हाल्नु दुर्भाग्य भएको पनि बताए ।
‘त्यो स्वर टेलिभिजनमा सुन्दा त मानौँ की नेपाल नै उथलपुथल भएर अलोकतान्त्रिक भन्नेकुरा जम्मै धर्ती मुनि पस्ला जस्तो। भरे माथि सतहमा आउँदा नागरिकता हेरे दुई वटा, राहदानी हेर्दा दुई वटा, अरु के तीन वटा’ उनले भने, ‘ त्यसपछि गएर ठगी। अनि निजलाई देशको सम्पूर्ण जिम्मा। म खालि रवि लामिछानेजीलाई मात्रै भन्न चाहन्न। उहाँलाई त्यहाँ राख्ने पनि उत्तिकै जिम्मेवार छन्।’
नेपाललाई एकाधिकार पुँजीवादको खेल मैदान बनाउने काममा नेपालका ठूला राजनीतिक दलका ठूला नेता आफैँ लागेको उनको भनाइ थियो।
