काठमाडौं । नेपाली कांग्रेसका प्रमुख सचेतक रमेश लेखकले ठगी गर्नेहरूलाई संरक्षण गर्न सरकारका मुख्य निकायहरू खटाएर दुरुपयोग गरिएको बताएका छन् ।
आइतबार राष्ट्रिय जनमोर्चाले आयोजना गरेको ‘सहकारी रकम अपलचन र त्यसमा राज्यले गरेको संरक्षणबाट उत्पन्न परिस्थिति’ विषयक अन्तरक्रिया कार्यक्रमलाई सम्बोधन गर्दै
उनले यस्तो बताएका हुन् ।
ठगी गर्ने मानिसलाई संरक्षण गर्न शक्तिशाली निकायको प्रयोग गरिएको बताउँदै सचेतक लेखकले सरकारको बारेमा कुरा गर्दागर्दै अर्को सरकार बन्ने स्थिति देखापरेको बताए।
‘अहिले एउटा नयाँ प्रयोग हामीले ल्याएका छौँ। धेरै नयाँ त होइन पुरानो प्रयोग नै हो। मुलुकमा यस्तै, यहाँ एक जना वक्ता बोलिरहनुभएको छ, भाषण गरिरहनुभएको छ, भाषण सकिनु भन्दा पहिला अर्को सरकार बन्ने स्थिति छ। त्यो स्थिति अब यसपछि अघि नबढोस्,’ उनले भने, ‘राजनीतिक स्थिरता कायम हुन सकोस्। मुलुकमा विकास र समृद्धिका विषय अघि बढुन्। राष्ट्रिय हित र स्वार्थको रक्षा हुन सकोस्, हामीले संविधान जारी गरेको आठ वर्ष भइसकेको छ।’
मुलुकमा राजनीतिक स्थिरता कायम हुन आवश्यक रहेको उनको भनाइ थियो।
संविधानको उचित समीक्षा गरी समसामहिक संशोधन गर्न आवश्यक रहेको बताउँदै उनले मुलुकमा अब राजनीतिक स्थिरता, मुलुकका समस्या समाधान गर्ने सरकार बन्न आवश्यक भएको जिकिर गरे।
